Awe tabata un dia special pa Cuerpo Policial cu un total di trintidos auto nobo entrega cu lo ta riba caya entrante awe. Nan a haci e entrega den un momento simbolico cu nan coleganan pensiona cu a entrega e yabinan n’e generacion nobo di polis, e coleganan hoben presente.
“Esaki ta un momento awe di hopi respet pasobra e pensionadonan aki ta hendenan cu a bini prome cu nos y ta e schoudernan cu nos ta para riba dje, nos ta hopi agradecido di nan,” segun drs. Ramon Arnhem, Altocomisario di Cuerpo Policial a expresa.
UN BIAHA POLIS, SEMPER POLIS
E grupo di pensionado a haci entrega n’e polisnan nobo cu e mensahe simbolico tambe: ‘Un biaha polis, semper polis’ un momento hopi bunita sigur. Pedro Krozendijk, su nomber di cariño ‘Shon Pe’ ta un ex polis cu diferente funcion, manera vocero di polis pero tambe como docente di polis pa dies aña.
Krozendijk ta un di e personanan invita pa entrega e yabinan simbolicamente. “Mi a sinti hopi bon, mi ta haya falta si pasobra mi kier a dal un rond cu e auto, e ta un honor sigur sigur.” Krozendijk ta bisa cu ora honra hende n’e mundo aki ora ta na bida, e ta algo pa aprecia. “Ora bo ta den bo caha di morto e ora ta bisa con bon polis bo tabata ta y con bon hende bo tabata ta, no ta bisa mi nada mas. Mi ta aprecia esaki sigur y mi ta kere mi otro coleganan tambe, pasobra nos tur cu ta pensionado ta haya ta un honor pa simbolicamente duna e polis jong y generacion nobo e yabi di auto di polis pa nan por sigui.”
E Altocomisario a menciona cu Krozendijk tabata un cu a ricibi yabi di e auto Mitsubishi y awe ta haci entrega di un Ford na otro polis, anto e sentimento ta hopi bunita segun Krozendijk. “Ora nan a yama mi nan a bisa mi ami tabata e prome polis cu a bel, y splica mi kico e ta, y mi ta tum’e anto no ta pa publicidad. E publicidad cu mi tin den tur añanan cu mi a traha den comunidad ta asina grandi cu mi no mester di mas. Pero como hende humano sigur e ta yuda,” segun Krozendijk.
Shon Pe ta sigui na bisa cu mirando con Arnhem ta desplega su trabao den comunidad e ta haciendo e hopi tremendo, e ta haya cu ta bon ora cu e tres añanan aki ta caba p’e haya prolongacion y por wel di keda. “Pasobra un hende cu a integra asina bunita den nos comunidad bo tin cu wak e banda positivo di dje. Como polis e ta e ‘sterke arm’ anto bo a mira esaki den Arnhem ora a subi Hooiberg cu e personanan incapacita recientemente.
