Aruba ta preparando pa e luna di conscientisa riba abuso di mucha. Den cuadra di esaki Prome Minister mr. Evelyn Wever Croes a tene un conferencia di prensa. Den e reunion aki a bini dilanti e tema di castigo minimo, cual organisacionnan hopi biaha ta cuestiona di con no ta haci algo riba e punto aki.
E mandatario a cuminsa pa splica cu na aña 2020 a subi e castigo maximo pa e tipo di delitonan aki. Esaki ta pa e keda den linea di loke ta e castigo den Reino Hulandes. “Nos tabata cana atras y tabatin e castigonan mas abou den Reino, pero na 2020 a corigi esey.”
Na aña 2010 e ciudadano Lissette Gomez a bini cu un iniciativa pa e castigo minimo. “Mi mes a sostene e tempo ey y a traha un ley pa yega na e castigo minimo.” Pero e concepto di ley aki a haya consehonan negativo for di huristanan. Y e conseho positivo tabata masha poco.
Prome minister a splica cu e obhecion principal pa cu un castigo minimo ta cu ora introduci esaki, e tin e riesgo(nan) cu e ta bini cu ne. E minimo no por ta dies (10) aña, sino 6 luna, un of dos aña, cu ta hopi abou. Banda di esaki, huesnan a splica tambe cu poco prueba por duna 6 luna of un aña. Pero si bini cu un castigo minimo, y si den e caso tin poco prueba, no ta haya nada di castigo. E ta splica cu e parti pa yega na e prueba pa por impone un castigo minimo ta hopi halto. “E riesgo ey sinceramente mi no kier a tuma y a dicidi pa pone un banda.”
Pa relato amplio lesa TREMPAN.
