A.R mester a presenta den corte hustamente riba su fecha natal. Y esaki no tabata pa algo agradabel. Como regalo el a haya un castigo di prizon pa e echonan di cual a acus’e di a comete. E acusacion contra dje ta cu den e periodo di prome di augustus 2022 pa 8 di februari 2023, el a viola ley di droga. E tabatin en total cuater (4) acusacion contra dje.
Ta papia di posesion, benta of transporte di cocaina, y marihuana. E di tres acusacion ta cu riba 8 di februari, 2023 e tabatin pildo di XTC den su poder. Y e ultimo acusacion ta cu den e periodo di 13 di december 2022 pa 8 di februari 2023 e tabatin arma di candela y bala cayente den su poder. E acusado no por a haci nada otro cu admiti cu e polisnan a haya droga plama den cada skina di e cas.
Durante henter tratamento di e caso el a expresa su arepentimento, cu e kier cambia pa ta un bon ehempel pa su sobrinonan. Fiscal no a mustra mucho di ta kere loke e ta bisa, si mira cu no ta prome biaha el a haya su mes dilanti mesa berde pa bende droga.Y tabata di sorpresa cu e autoridadnan a yega na e caso aki contra A.R. Tabata tap combersacion pa un otro caso, ora cu autoridad a bin cay riba e caso aki. Den e caso di e arma, el a splica cu e polisnan mes a bisa cu no tabata un pistol di berdad / of cu ta funciona.
Echo ta cu el a sconde e arma, ora cu el a biaha pa Colombia en busca di su salud. Hustamente pa e motibo aki, e ta kedando ciego di un banda di wowo y e echo cu e kier yuda su mama, ta motibo cu el a cay atrobe den e negoshi di droga. Representante di Ministerio Publico a papia di cinco testigo cu a yega di cumpra droga for di dje, cu ta suficiente pa pidi Corte declar’e culpabel. Pa loke ta e castigo, e fiscal ta haya, mirando e periodo y droga confisca, ta na su luga un castigo di 36 luna di cual seis luna ta condicional y tres aña di prueba.Aunke cu e acusado a expresa su arepentimento, a conclui cu e por demostra esaki despues di sinta su castigo. A dicidi di impone e mesun castigo cu fiscal a pidi. E lo mester sinta e ora, cu e VI, 20 luna. Y si a detene na februari, e lo sali na october, 2024 mas o menos.
