Tres auto y dos herido envolvi den accidente na Paradera

Diadomingo mainta, pa mas of menos 9’or, polis a bay cu urgencia na altura di e Animal Care Clinic na Paradera, pa un accidente basta fuerte.

Eyan a bin topa cu 3 auto riba caminda, dos cu hopi daño material, y un Kia Sportage cu rasca na banda.

 

Aparentemente chauffeur di e Kia Sportage a subi caminda for di banda di panort, mientras e Chevrolet Aveo tabata biniendo cu velocidad halto for di pabou.

Chauffeur di e Aveo posiblemente bou influencia, a lastra un brake, el a medio mishi cu e Sportage pa despues kita bay dal e Mitsubishi Lancer.

Ambos chauffeur tanto di e Lancer y e Aveo a resulta herida. Ambulance a pidi asistencia di Materiaalwagen debi cu e porta di e chauffeur di e Aveo a pega y tabata dificil nan sake.

Bomberonan na e sitio a drenta den accion cortando e porta pa asina logra saca e chauffeur di e Aveo.

Dos ambulance a presenta y a transporta ambos chauffeur pa hospital pa asina nan ricibi tratamento medico avansa.

Ariba caminda a keda basta azeta y por a mira cu a yama esnan concerni pa bin basha tera.