Riba nos Dia Nacional tabata tin un ambiente dushi na San Nicolas tambe. Hopi hende, muchanan na cantidad, mayornan, tur a bin pa mira un show di Avioneta.
Presidente di e club, sr. Del Prado, a splica cu e actividad tabata pa demostra e pueblo di Aruba, cu nan tey ainda y cu tin diferente avion. Tin jet, tin hasta un helicopter. E club ta activo ainda.
Tabata tin basta avion. E avionnan aki tin diferente doño. Segun del Prado, tin cierto doñonan tin mas cu un avion. E buladornan cu ta activo, por ta mas of menos 15 cu tabata tey presente.
Por a mira manera un dia manera Dia Nacional, nan a yama basta hende. Normalmente tur diadomingo nan ta bula y train. Esnan cu por yega riba e veld, nan ta bin bula. Durante di aña ta wak con hopi e interesnan ta cu e miembronan, ta organisa funfly of haci algun competencia facil.
Mantene e club activo
Tin hopi mucha ta gusta e show di avion. Pa mantene activo ta dificil si, pasobra e prome inversion den avion ta tiki caro. Un avion completo pa train, por sali 1000 florin. Pa un mucha cuminsa cu 1000 florin, tin biaha pa e mayornan ta cay duro. Awo cu e club, ta bezig ta recauda fondo pa por arma dos pa tres avion cu por duna les cun’e. E ora solamente nan mester paga pa e fuel cu nan ta uza. Esey ta loke e club ta bezig cun’e.
E fuel cu e avionnan ta uza, ta special. Algun di nan ta uza nitro y otronan ta uza gasolin. Hopi hende ta stap over pa bay pa gasolin mirando cu ta dificil pa por trece e fuel nitro na Aruba. E ta haci e avion tiki mas caro.
Avionnan ta bula duro
E averahe di e trainer, si por bul’e full trot, e ta bula trankil 90 miya pa ora. Pero tin dos di careda, cu ta casi yega 200 miya pa ora.
Evento
E evento na San Nicolas, ta pa buladonan di Aruba so. A invita un persona for di Corsou, pero mester a cancela, mirando cu e no a alcansa pa yega Aruba pa haci su show. Door cu e aña aki ta haci 45 aña, kier drecha e luga, hacie netjes, e ora por ta na Augustus of October e ora kier haci un evento grandi, wak si por invita Corsou y por ta Puerto Rico.
Exitoso
Sigur cu e dia aki tabata exitoso pa e organisadornan di e show di avioneta, caminda cu grandi y chikito a disfruta di un tremendo show.