Awe merdia pa mas o menos 2:45pm a sosode un accidente durante e di 22 edicion di “Camacuri Flag & Anthem Day Ride” na altura di CMB Wayaca riba Green Corridor. Tabatin tres motorcycle participando den e tour envolvi den e accidente, di cual un motociclista local a resulta herida. Su situacion ta stabiel y ta interna na Hospital pa mas observacion y tratamento medico.
E aña aki pa di 22 aña consecutivo ta organisa e tour, den cual motociclistanan local y internacional ta participa pa keiro tur rond di nos isla riba nos dia nacional. A bin motorcyclenan for di Boneiro, Corsou, St. Maarten, Merca, Canada, Hulanda y hasta for di Surnam.
A cobra cada participante 65 florin pa inscripcion, cu ta inclui desayuno na Balashi Beergarden mainta, pa despues sali direccion ex Bushiri Hotel, pasa lunch na Garage Centraal y caba bek pa 4:00pm na Bucuti Jachtclub cu ambiente musical.
Sinembargo bayendo abou na altura di CMB Wayaca a sosode un accidente. Un motorcycle di Corsou a sal tras di un motorcycle di Aruba, cu a cay y na su turno e vehiculo a bay dal den step di un di e motorcyclenan di Corsou.
Polis di trafico a presenta na e sitio pa investiga e caso, mientras dr. Lacle, cu tambe tabata riba un motorcycle a coordina e trabou di prome ayudo di paramediconan di ambulance, cu a yega mesora na e sitio pa brinda asistencia na e motociclista local.
