TOPA: Trahadonan di KIA ta exigi cabes di Gino Winklaar

Manera a menciona for di ayera, e tension den Instituto Coreccional Aruba (KIA) ta sigui crece y ta birando ora pa ora mas cayente. Sindicato TOPA a yama un reunion urgente awe merdia cu su miembronan den cura di prizon, situa na Santo di Patia, na San Nicolas. Ey a mustra nan mal contento y e rabia cu ta reinando despues cu e Director a menasa di tuma medida disciplinario contra nan tambe, si nan reuni. Ya caba el a manda henter e unidad di K-9 cas, pa motibo cu nan a meld ziek pareu. A tuma Gino Winklaar net 1 aña di tempo, prome cu trahadonan a lanta contra dje y ta pidiendo Minister pa retir’e.

Informacion cu a duna awe mainta na KIA ta cu pa awe tardi 3:00pm ta topa cu Minister Andin Bikker caminda cu mayoria miembro ta pidi cabes di e Director di KIA, Gino Winklaar. Esaki  ta por lo menos un di e exigencianan cu a comparti awe mainta na porta di KIA. Trahadonan ta demanda pa pone ex polis Emy “Gadaffi” Geerman bek den e funcion di Director di KIA. Sino por spera mas accion y escalacion!

Ex Polis Emiliana “Emy” Geerman, cu pa hopi aña a dirigi KIA, pero cu na momento cu Minister mr. drs. Arthur Dowers a asumi e puesto di Minister di Husticia den Gabinete Mike Eman, a opta pa mand’e cas cu salario pero sin trabou. Te awe e ta cobrando na cas, mientras cu Minister Andin Bikker a opta pa nombra Gino Winklaar awor den e funcion. Legalmente awor KIA tin mas cu un director riba payroll y keto bay e instituto ta yena di problema.

Pa 12:00PM trahadonan di KIA a sali aglomera na entrada di KIA pa reuni riba e puntonan cu lo presenta den reunion cu Minister di Husticia Andin Bikker. Shopsteward di sindicato TOPA, Leo Tromp, a duna di conoce cu e intencion no ta di pone trabou abou pero mas bien ta di a sali durante un ora y asina informa miembronan presente di kico lo ta e puntonan cu lo presenta na Minister di Husticia durante nan reunion. Tromp a menciona cu ta hopi punto di atencion nan tin pa trece dilanti pero lo no divulga esakinan.

Leo Tromp tambe a menciona e hecho cu e Director no a tuma e accion aki mucho contento y a categoris’e mas bien como un wild strike, cual segun Tromp ta trapa riba nan derecho como sindicato. A menciona cu KIA no tin problema cu Polis pero si ta lamenta cu na momento cu nan presenta nan ta causa hopi daño na e edificio cu despues ta keda pa nan como traha pa drecha. Esaki ta tuma tin biaha lunanan pa drecha.

Tambe a compronde cu a desolve e Team di K9 di KIA y ta pesey ta pidi asistencia di Polis pa drenta KIA. Ta sinti cu esey tabata idea di e Director for di un comienso. Mientrastanto tin full un team (di 11 persona) di K9 di KIA ta suspendi na cas pendiente reunion cu Minister pa haya sa e intencion. Sugerencia ta pa e Director envolve e trahadonan mas den decisionnan cu e ta tuma en bes di riba su mes. Tin hopi hende cu añanan di experiencia den KIA cu e por haci uzo di nan pero mientrastanto e ta purba draai e instituto su so.

Gino Winklaar a drenta Cuerpo Policial Aruba dia 1 di juli 2000 y mesora a bay studia na Hulanda pa e puesto di Inspector. Aki na Aruba bek el a traha den diferente funcion, entre otro como “Projectleider” y Hefe suplente den Recherche Samenwerkings Team (RST) pa 5 aña largo. Ey el a conduci varios caso y investigacionnan grandi, den cual a encera crimennan cu ta crusa frontera de Reino Hulandes y tin biaha hasta pa otro paisnan rond mundo. Desde dia 14 di mei 2018 e ta den funcion di “Districtchef” na San Nicolas, den cual su tarea ta pa mantene e operacion diario di henter e districto, incluyendo Polisnan uniforma, recherchenan, e personal administrativo y e departamentonan special cu ta traha for di e Warda di Polis di San Nicolas.Y desde prome di juni 2019, e ta den funcion di Director di KIA.

Tromp ta di pensamento un Director cu ta bin di Polis pa drenta KIA tin di bisti un pechi, no dos! Desde un principio a menciona na Minister cu no ta desea ningun Polis mas como Director. For di momento cu Trudy Hassel a bay, a vocifera cu no ta nan deseo di un Polis como Director den e instituto. Pero desicion tabata otro y ya por mira e efectonan di e desicion. Aunke ta pidi pa trece Emy “Gadaffi” Geerman bek pa dirigi e luga, cu porcierto tambe ta un ex-Polis.

Tromp ta bisa cu KIA nunca tabatin un Director stabiel pa motibo di politica. Trahadonan ta keda pero Directornan ta cambia cada biaha cu manehonan diferente. KIA actualmente ta onderbezet (un cantidad minimo di personal) cu ta pone presion riba e empleadonan cu ta meld ziek pa asina haya descanso pasobra no tin otro manera pa haya esaki. No ta algo di awo pero di semper, Leo a bisa mirando e tin 30 aña trahando.

Pa finalisa lo keda na miembronan y ta locual nan a vocifera dilanti e porta na KIA, cu locual nan ta desea ta e cabes di e Director y lo ta un di e puntonan riba mesa durante reunion cu e Minister awe tardi 3:00PM.

Tocante KIA

Korrectie Instituut Aruba, KIA, a muda pa su localidad na Santo di Patia na San Nicolas dia 22 di september 1990, pues casi 30 aña pasa. E prizon tin un populacion di un maximo di 200 detenido, parti den detencion preventivo, seccion di hende muhe y seccion di hubentud. Na KIA tin mas o menos 180 empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.

Noticia relacionaMas for di e autor