Manera ta conoci, e siman aki conoci como Siman Santo ta un di e temporadanan druk di aña riba nos isla. Nos reportero Leo Geerman a combersa cu Liliana Rasmijn, vocero di Cuerpo Policial Aruba riba e temporada di campamento 2024.
E vocero a splica cu e temporada a cuminsa riba diadomingo 24 di maart y e ultimo dia di campamento lo ta 7 di april. El a señala cu na esunnan cu ta bay campa cu na e forma cu a yega contento cu hopi animo pa disfruta di e temporada, pa di e mesun manera laga e luga cu a uza na un forma limpi y presentabel atras.
Pa aña 2024 a otorga 187 permiso mas. Compara cu 2023 a bin diestres permiso mas, den loke ta e total di personanan cu lo ta campando e aña aki lo ta alrededor di 3000 persona.
Rasmijn a splica cu tin regla- y condicionnan pa por campa tur aña. Pa aña 2024 a haci algun adaptacion den consulta cu KPA (Korps Politie Aruba) y DWJZ (Directie Wetgeving en Juridische Zaken). Un di e cambionan ta tocante e uzo di musica cu awor por “toca” musica durante dianan di siman for di 8:00am te 8:00pm y den weekend te 12:00am. Pero esaki no por ta un molester pa otro personanan campando y mester tene cuenta pa respeta cada persona y nan creencia na e area di campamento.
A pone enfasis riba e parti di e beach encuanto e grill (uza principalmente pa BBQ) cu mester ta di gas y ta absolutamente prohibi bao tur circunstancia pa pone un grill riba e parti di beach (santo blanco). Loke si ta permiti cu por pone un grill riba e parti di asfalt of klinker.
Pa loke ta tentnan tin cu percura pa nan ta den bon condicion y presentabel, e vocero a splica cu ta informa di antemano e usuarionan prome cu e temporada di campamento cuminsa riba e reglanan. Igualmente tin cu percura pa tene e area di campamento limpi, ta conoci cu esunnan campando ta contrata companianan di sushi, cu ta bin busca sushi na e area di campamento pa asina tene e area limpi y bunita.
Un condicion (nobo) cu a bin acerca ta cu e area cu ta uza pa campa mester tin un toilet (WC) portatil instala. E unidad sanitario mester ta poni riba un palet di plastic bon instala, ta prohibi pa e awa sushi di e unidad sanitario bay lama.
Rasmijn a enfatisa cu e permiso di campamento mester ta poni na un luga visibel, y no den auto of tas. A duna un ehempel cu si pa malasuerte cu Polis a pasa pa controla e permiso y e documento no t’ey, tin e extra trabao cu mester bay busca e persona cu tin e documento den su poder of cu Polis mester bay y bolbe un biaha mas. E agente policial a señala cu ta hopi mas facil pa tin e documento poni na un luga visibel cu facilmente durante control di Polis por wak e permiso.
Polis lo haci control regular durante e dianan di campamento pa verifica cu e permiso ta na ordo y cu tur informacion ta corecto.
Vocero policial Rasmijn a enfatisa hopi fuerte pa por fabor pa baha e velocidad na momento core auto: “si ta bebe no stuur, no ta abo so tin cu yega cas, ta tur hende tin cu yega cas sano y salvo”. Ta e deseo pa habri otro siman cu bon noticia cu tur cos a bay trankilo tanto pa area di campamento y trafico.
Na final e representante di Cuerpo Policial a haci un apelacion pa “please no laga mucha zorg pa mucha” pa por fabor percura pa tin adulto presente pa tira bista riba e muchanan cu ta den lama y percura cu nan tin sunblock poni.
Na nomber di Cuerpo Policial, ta desea tur hende un temporada di Siman Santo placentero den famia.
