Riba Huebs Santo pa 11:00am, Fraccion di Raiz den Parlamento di Aruba, forma pa Misha Raymond y Raymond Kamperveen, lo laga pueblo sa nan decision final, despues cu Presidente di Parlamento, Edgard Vrolijk, no a cumpli cu nan peticion pa yama e reunion publico pa atende e ley cu ta permiti matrimonio di pareha di e mesun sexo. Den un situacion asina, e coalicion ta mir’e como MEP cu no a cumpli cu un peticion di Raiz, cu probablemente lo bin cu su consecuencia politico.
Kico e consecuencia lo bira, ta di spera pa mañan mainta pa nos tende kico RAIZ lo tin di bisa. Tin diferente scenario riba mesa. Asina ta scucha cu Misha Raymond lo por distancia su mes di e partido politico y bira un miembro independiente den parlamento. Tambe e lo por anuncia di ta kita su sosten na Edgard Vrolijk como presidente y exigie pa e tuma su retiro di forma boluntario of lo bah’e den e siguiente reunion publico. Den caso cu Misha Raymond doblega e biaha aki, e lo por conta cu su votadonan no lo sosten’e mas den futuro pa motibo cu pa hopi, e ley aki ta esencial y di importancia.
Echo ta cu Misha Raymond, sosteni pa otro parlamentarionan, a manda un carta pa Edgard Vrolijk, den su calidad di presidente, pidiendo e pa yama e reunion pa atende e ley cu ta permiti un pareha di e mesun sexo pa casa cu otro. Te cu awor, esey no ta posibel na Aruba. Parehanan di mesun sexo mester biaha pa Boneiro, por ehempel, casa eynan y bin inscribi nan matrimonio na Aruba.
Edgard Vrolijk a laga sa cu e lo no yama dicho reunion pasobra e comision cu ta atende cu e cambio di ley aki no a caba di reuni cu tur e stakeholdernan ainda. Pa colmo, Parlamentario Alvin Molina di MEP ta na Hulanda pa un biahe personal tambe, pues coalicion tin 10 asiento so na e momento aki, pues dificilmente lo haya quorum mes.
Pero su decision, cu Vrolijk a anuncia publicamente den un entrevista exclusivo cu 24ora.com no a cay den bon tera cerca Misha Raymond. E ultimo aki a manda un di dos carta, den cual el a duna e Presidente di Parlamento un deadline te cu awe tardi 5:00 pm pa e yama e reunion. RAIZ no a indica den nan carta cu si lo tin consecuencia den caso cu Vrolijk no cumpli cu e peticion haci.
Na momento cu a bira cla cu no a cumpli cu e peticion, mesora a sali un invitacion di e Fraccion di RAIZ pa un rueda di prensa Huebs Santo pa 11:00 am den e sala di prensa di Parlamento di Aruba. Kico nan lo anuncia, ainda ta keda na speculacion. Por lo menos un parlamentario di oposicion, Miguel Mansur, a specula riba su pagina di Facebook di kico ta e scenario politico awo. E prome ta cu Misha Raymond ta retira su sosten den Presidente di Parlamento y consecuentemente e gobierno ta cay. E di dos opcion ta cu Edgard Vrolijk ta tuma retiro como presidente pa salvaguardia Gabinete Wever-Croes II. Y di tres posibilidad ta cu RAIZ ta dobla atrobe.
Ayera ainda e lider di RAIZ, Ursell Arends, a contesta cu e no lo papia nada mas den prensa riba e tema aki y cu nan lo sigui na mesa cu MEP pa sali for di e impasse. Ni un dia a pasa y ata RAIZ mes ta yama conferencia di prensa, scogiendo toch pa e caminda di debate publico den prensa cu MEP.
Tocante Gabinete Wever-Croes II
Eleccion yama adelanta dia 25 di juni 2021 a produci un resultado di cual e panorama politico a bira MEP cu 9 asiento, AVP cu 7 asiento, Raiz cu 2 asiento, MAS cu 2 asiento y Accion21 cu 1 asiento, pa hunto forma e 21 asientonan den nos Parlamento. Dia 20 di september 2021 e ocho ministernan di e Gabinete Wever-Croes II a huramenta of haci promesa dilanti di Gobernador Interino di Aruba, Yvonne Laclé-Dirksz. E gabinete Arubiano nobo ta un coalicion di MEP y RAIZ y ta conta cu ocho minister: seis di MEP y dos di RAIZ. Gabinete Wever-Croes II ta forma pa Evelyna C. Wever-Croes (MEP) como Minister di Asunto General, Innovacion, Organisacion gubernamental, Infrastructura y Planificacion Teritorial. Alabes e ta minister-president. Geoffrey B. Wever (Raiz) a bira Minister di Asunto Economico, Comunicacion y Desaroyo Sostenibel. Ursell M. Arends (Raiz) a haya e cartera di Minister di Integridad, Naturalesa, Transporte y Cuido di Grandinan. Alabes e ta e vice Prome Minister. Xiomara Maduro (MEP) a huramenta como Minister di Finansa y Cultura. Rocco Tjon (MEP) a bira Minister di Husticia y Asuntonan Social. Glenbert Croes (MEP) a huramenta como Minister di Labor, Integracion y Energia.
Danguillaume Oduber (MEP) a bira Minister di Salud Publico y Turismo. Endy Croes (MEP) a haya e titulo di Minister di Enseñansa y Deporte. Na un prome instante a mantene Guillfred Besaril den e funcion di Minister Plenipotenciario di Aruba na Hulanda, pero na caminda el a tuma su retiro y a nombra Juan “Ady” Thijsen na su luga. Debi na un investigacion interno, a kita Besaril for di trabou y a keh’e penalmente.
