Diamars tabatin un conferencia di prensa di Minister Dangui Oduber, encarga cu e cartera di turismo y tambe salubridad publico.
Representante di Headlines Group, cas editorial di 24ora.com y bo matutino digital TREMPAN, Leo Geerman, a combersa cu Minister Dangui Oduber riba e situacion di hospital. Esaki ta en bista cu cu algun siman pasa e director di e instituto medico tawata un invitado durante e programa Enfoke, unda cu el a trece dilanti cu Gobierno tin un debe grandi cu hospital, cual ta un tema fastioso pa atende.
Minister Oduber a confirma cu berdad e ta un situacion fastioso y e debe a bin ta acumulando ultimo añanan, a mustra cu hospital no por nenga cuido of servicio na ningun persona, hasta si ta den caso di un ilegal.
Igualmente e mandatario a splica cu cuido medico ta conta hasta pa turistanan cu no tin un seguro medico den caso di un accidente of algo pasa nan durante vacacion. Gobierno tin e obligacion pa duna e cuido medico, esaki ta e causante cu e ultimo añanan e debe cu hospital a bin ta aumentando y ta responsabilidad di Gobierno pa cumpli cu e debe aki.
E mandatario encarga cu e cartera di salud a añadi cu a prepara un proceso legislativo, a menciona tocante “un pandemische paraatheids fonds” lo cobra e turista cu lo bin Aruba 15 dollar, for di e suma aki lo reparti e entrada ricibi di 15 dollar pa turista den tres parti:
1) Un parti lo bay pa Gobierno di Aruba
2) Un “pandemische paraatheids fonds”, cu ta un fondo pa inverti den prevencion
3) E otro parti lo ta pa cubri gastonan di ilegalnan como tambe e turistanan
Asina aki e politico a mustra di e forma aki lo por cuminsa reduci e debe habri di 10 miyon na hospital actualmente. E instituto medico mester di e fondonan aki pa keda haci e inversionnan necesario pa mehora calidad di cuido y servicio. Oduber a menciona di “ta consciente di e situacion”, p’esey Gobierno a pensa riba e modelo di “pandemische paraatheids fonds”.
A puntra e mandatario si separa di e modelo cu a propone si por ta un otro forma pa yega na e suma mas lihe posibel, riba cual e mandatario a contesta cu ta sondea e posibilidad pa medio di e presupuesto di Gobierno di Aruba si por tin fondo disponibel pa cuminsa reduci e debe habri cu hospital.
