Parlamentario Endy Croes awe a confirma e rumor di cu tin un investigacion andando den su contra pa posibel traficacion di hende. Ta papia di mas o menos 50 hende cu a haya VISA di Reino Hulandes e ultimo dos añanan cu el a para garantia pa nan, pero cu nan no a regresa y algun a gara trahando na Aruba. Como cu Hulanda ta esun cu ta otorga VISA, e asunto aki ta hayando atencion na e nivelnan di mas halto.
E momento cu a señala e caso, no tabatin ni idea cu ta trata aki di un Parlamentario di Aruba, cu ta sostene e Gobierno na mando. A menciona nomber di miembro di Parlamento pa Fraccion di MEP, Jan Hendrik “Endy” Croes. E ultimo aki ta bisti diferente pechi, entre otro esun di directiva di Aruba Softball Bond, inscribi riba su nomber y cu oficina na su cas, Figaroastraat # 1 na Noord.
Fuentenan for di Warda nos Costa a confirma na nos cu for di aña pasa tin bista riba e Parlamentario, buscando e stranheronan cu el a trece y permiti nan keda biba y traha na Aruba. Varios di nan a gara trahando, entre otro den kapsalon.
Awe e Parlamentario mes a bay na Top 95 y na Hit 94 pa aclaria e situacion cu el a hinca su mes aden. El a confirma di a trece Dominicanonan na Aruba pa hunga softball y cu el a compronde awo cu 4 of 5 a keda atras. Locual e no ta bisa ta cuanto hungado di softball a deporta caba ora Warda nos Costa a topa cu nan trahando. E forma con el a trece e “deportistanan” aki ta masha cuestionabel y bale la pena pa Ministerio Publico investiga e “modus operandi” aki.
Ora cu pidi permiso pa trece hende hunga bala y wanta e “turistanan” na Aruba pa nan traha, no ta di Aruba so e ta burlando, sino tambe di Hulanda cu a confia y a laga hendenan drenta un pais den Reino Hulandes cu visa.
E preguntanan cardinal ta: Minister di Husticia, mr. Andin Bikker ta na altura di e practica di e miembro di coalicion? Minister ta aproba e miembro di coalicion ta aportando na ilegalidad riba nos isla? Cuanto di e Domicanonan cu a bin pa hunga bala a keda mas largo cu e temporada di torneo? Cuanto di e Dominicanonan ainda ta na Aruba ilegal? E manera di proceder di e Parlamentario tin consentimento di Minister di Husticia y tambe di Fraccion di MEP/RED/POR den Parlamento? E Parlamentario lo haya multa mescos cu tur otro supuestamente ta hayando ora cu atrae, sconde of permiti ilegalidad riba nos isla?
Parlamentario Endy Croes no ta desconoci pa husticia. Den pasado a investig’e y persigui’e y a conden’e pa su funcionamento como Presidente y despues Director di Fundacion Lotto pa Deporte. El a perde tur su casonan y na final a gana un caso civil contra e compania Ernst & Young cu entretanto a apela e sentencia tambe. Durante e caso civil entre Lotto y Croes, a keda legalmente proba cu el a mal maneha e fundacion y a enrikese su mes y su famia cu fondonan di Lotto. Ta obvio cu e no a siña su les, pasobra at’e awo atrobe den un investigacion, cu probablemente lo por yega Ministerio Publico dependiendo con serio Hulanda ta mira traficacion di hende y burlamento di nan proceso di Visa.
E Gobierno nobo, cu ta carga e nomber di Gabinete Wever-Croes tin integridad den gobernacion masha na halto riba nan lista di prioridad. Ta di mira awor kico Prome Minister Evelyn Wever Croes y Lider di Fraccion Rocco Tjon lo haci alrespecto, awor cu tur cos ta mustra cu un miembro di nan partido y nan fraccion, ta wordo signala pa posibel traficacion di hende.
E pregunta ta si Endy Croes lo por keda den parlamento of mester tuma honor na su mes y entrega su retiro. Rocco Tjon, siendo un ex Polis, ta bon na altura cu den casonan di traficacion di hende, ta cera e sospechosonan mesora. Ta contra ley para garantia pa hendenan bin Aruba riba Visa y despues conscientemente laga nan keda Aruba pa biba y/of traha.
