Decision a cay: Ta cera ambos Scol Practico pa Ofishi

45

Minister di Enseñansa ta adelanta cierre di aña escolar di e dos scolnan SPO (Scol Practico pa Ofishi) situa na Santa Cruz y Brazil. Esaki e Directora interino di DPS, Nora Eleonora, ta bisa den un carta na e dos scolnan aki.

Manera ta conoci, siman pasa Eleonora a bishita e scol na Brazil pa mira cu su propio wowonan e infrastructura aki y tur loke cu mester wordo drecha. Diamars, 25 di juni, e carta a yega na e scolnan, bisando cu na SPO Sta Cruz mester haci diferente adaptacion den construccion y na esun di Brazil ta bay drecha e construccionnan malo cu a wordo haci.

Debi na e trabounan aki cu mester wordo haci pa tur cos ta cla na inicio di aña escolar nobo, segun Leonora, ta pidi e scolnan pa cera nan porta. Ta pidi pa informa e muchanan pa bolbe dia 5 di juli venidero pa ricibi nan resultadonan, si nan ta bay over of no.

Esaki ta nifica cu e dos scolnan ta cera nan porta diabierna, 28 di juni. Pero na mesun momento ta bisa cu e docentenan si lo no ta liber, y nan por cuminsa prepara pa trabounan pa e aña escolar nobo.

E carta ta mustra inocente, pero docentenan a expresa na 24ora.com cu nan tin miedo cu tras di esaki tin cierre di e scolnan na Sta Cruz y Savaneta. Informacion extra oficial cu a yega cerca nan ta mustra cu e mandatario ta pusha pa sigui cu su plannan, hasta si esaki ta nifica cu e mester pone trailer na Brazil pa por acomoda tur e studiantenan di SPO.