Docentenan di SPO sumamente preocupa cu e direccion cu Minister Lampe kier hiba

Sindicato SEPPA y SIMAR tabata dilanti Bestuurskantoor, pasobra e docentenan di SPO no ta contento cu e contesta cu nan a haya for di Minister diabierna cu a pasa, Minister a contesta e pregunta di e docentenan di SPO pero e contesta cu nan a haya no ta cuadra.

A sinta diabierna hunto cu nan y a evalua e situacion. A dicidi pone tur cos riba un carta y bay na Prome Minister, segun Josephine Martilia-Albertus, presidente di SIMAR.

E situacion cu tin na SPO Brazil, no ta un situacion saludabel pa laga docente ni alumno ta eynan.

Reaccion di Minister

E prome pregunta cu nan tabata tin ta, pa sa si ta bay tin e union di SPO Santa Cruz y SPO Savaneta. Y riba e contesta ey a tende cu pa e siguiente aña escolar, e alumnonan di prome aña tur tin cu bay SPO Brazil. Na SPO Santa Cruz, lo keda di dos y di tres aña. Esey ta nifica cu aki dos aña SPO Santa Cruz no lo existi mas.

Si sigui wak diabierna ora cu a cana den e edifice na na Brazil y a mira e situacion, no por conclui otro cu e no ta algo saludabel pa bisa cu ta bay pone mas alumno. E situacion no ta agradabel pa e docenge y alumnonan cu ta eynan awo, segun Martilia-Albertus.

Ta pa e motibo aki nan tabata hunto cu e docentenan dialuna mainta, pa asina vocifera nan mes riba e contesta cu e Minister a duna.

Riba e di dos pregunta cu nan tabata tin encuanto curriculum, a constata cu e Minister kier bin cu fuseering e ora no mester traha curriculum nobo. E docentenan mes no a mira e curriculum ainda. Nan a pidi pa nan haya esey. Diabierna nan a tende cu e curriculum ta cla riba macro niveau y riba micro niveau e docentenan lo tin cu traha riba dje pa dun’e forma, pa por traha cun’e den klas.

Riba e di tres pregunta cu tabata tin, mirando cu pa otro aña escolar directiva di SPO Santa Cruz no lo tey mas, a puntra si por tin un vacatura habri unda cu nan por reacciona riba dje. Riba esey a haya contesta cu pa otro aña no lo bay tin un Director of Directora na SPO Santa Cruz. Directie di SPO Brazil tin cu traha cu dos scol. Si wak bon, aki dos pa tres aña no lo tin dos scol, sino un solo scol.

SEPPA brindando apoyo

Magali Brito, Secretario General di SEPPA, a splica cu e docentenan di SPO y tur esnan cu ta traha na e dos scolnan aki, tanto na Santa Cruz como Brazil, despues di a tuma nota di tanto e resultado di encuentro cu Parlamento, e forma con na final ta wak cu e contestanan cu ta wordo duna y na final nada no ta bin for di eynan. Nan ta trata di duna nan un miho claridad, un satisfaccion. Si wak bon e resultado di e carta cu a wordo dirigi na e trahadonan door di e Minister riba su posicion kico ta bay sosode cu SPO, e trahadonan no a keda contento cu esaki. Dialuna nan a demostra nan mal contento y lo entrega un carta, cu tur informe di loke a papia for di comienso te awor aki, loke a bin ta haciendo pa mustra e Minister di Enseñansa cu e posicion cu e ta tumando, no ta esun di mas corecto. A base di e carta aki lo wak si e Prome Minister ainda por haci algo riba e tereno aki.

Sinembargo no ta descarta cu esaki no solamente ta keda na un señal di mal contento, pero hunto cu tur e gruponan por bin un tiki mas leu cu tur esnan cu ta traha den mundo di enseñansa.

Brito a sigui splica cu tin mas grupo cu ta traha den enseñansa cu a pidi encuentronan cu SEPPA. No ta kita afo cu e gruponan aki tambe ta mal contento cu e direccion cu Enseñansa ta hibando, con ta perhudica no solamente nos muchanan, nos hobennan y e futuro di pais Aruba, pero tambe trahadonan cu ta traha den e ramo aki y cu for di e mesun gruponan aki, dependiendo di tur e puntonan cu ta bin dilanti, tambe lo kier mustra nan mal contento.

No ta kita afo, cu mañan lo tin un unidad grandi di tur esnan cu ta traha den e mundo di enseñansa, cu nan tambe ta mal contento y  mas leu ainda, hopi preocupa cu e direccion cu e Minister kier hiba den Enseñansa.

Comments

comments