No por a premira e gravedad te na momento cu a yega sitio y topa cu locual e candela a haci cu un vehiculo riba Green Corridor.
Diabierna mainta, den careda di 11:20am, polis a presenta cu urgencia na rotonde di Drive Inn riba Green Corridor pa un alarma di un auto na candela. Momento cu a yega sitio a observa cu enberdad tabata tin vlamnan saliendo di e parti dilanti di e vehiculo.
Tabata trata di un Mitsubishi Van color shinishi cu tabata para na riba caminda yegando e parada di bus. for di banda di chauffeur tabata wak vlamnan saliendo como tambe hopi huma. Mientras tabata warda prime unidad di brandweer yega sitio por a mira con e candela tabata destrui e auto por completo.
Na yegada di brandweer no a resta nada, pero si mester a bringa un bon rato pa paga e candela aki den su totalidad.
Tambe por a scucha con tabata tin cosnan ta rementa for di direccion di e auto. E chauffeur tabatat den cercania, no tabata herida pero sigur hopi spanta cu locual cu a pasa.
Polis a cera for di rotonde Drive Inn te cu rotonde Sero Theishi pa evita trafico yega cerca, mirando cu e huma a tapa visibilidad riba caminda principal. Pa mas informacion riba e susedido subi Trempan.com