Den e normal nobo Miss Aruba Online Foundation ta organisando nan di dos eleccion di reina di beyesa den un forma completamente virtual.
Endy Croes, na cabes di e organisacion, a cuminsa cu e organisacion den pleno pandemia cu tur e medidanan cu a wordo introduci. Pero a dicidi di organisa un certamen toch pa mantene esaki na bida. Aña pasa tabatin diesun participante y e aña’ki tin 13 candidata, di cual ta un dama Arubiano biba na Corsou.
Loke ta haci e certamen aki diferente ta cu no tin discriminacion. E participante por ta casa, y hasta por tin yiu. Pero tambe e por ta halto, cortico, flaco, diki, etc. Ta celebra simplemente e hende muhe, su talento y personalidad.
Durante un ceremonia a presenta tur e candidatanan y a splica cu e lema di e certamen ta redifiniendo e standard di beyesa. Tur hende ta bunita manera nan ta.
E certamen ta parti of dividi den dies seccion (challenge). Por haya e pagina riba instagram #missaruba_online y aki riba tur hende por vota pa nan candidata. E voto ta yuda pa e puntuacion final pero 90% ta bini di e cuerpo di hurado: Aurora Dijkhoff; Sharlin Leslie; Zizi Lee (finalista na Miss Mundo); Jelitza Domacasse Helmeyer y Rodney Aniceto.
E eleccion ta cuminsa dia 26 di maart y ta finalisa 25 di april directamente for di Patio 15 den un setting completamente diferente.
