E perspectiva historico cultural ta permiti nos contempla e desaroyo funcional di un mucha y su educacion como un proceso conhunto, conoci como ‘educacion desaroyado’. Esey ta pensamento di parlamentario pa partido MEP, Sue-Ann Ras. E ta referi aki entre otro na e tema di e fiesta cultural di Aruba, Dera Gay. Durante 2 siman, Departamento di Cultura a entretene y educa alrededor di 7 mil mucha di scol preparatorio y scol basico di Aruba. “Mi ta masha contento di por tabata den sala, durante e ultimo presentacion di diahuebs, hunto cu 2 scol mas: St. Aloysius y Sagrado Curason. Tabata reina un ambiente festivo, di alegria y curiosidad, unda cu hunto ta prepara pa un gran celebracion cultural, ya cu scol ta un espacio unda cultura ta cruza y tin un relacion peculiar,” Ras a cuminsa bisa.
PREPARACION COMPLETO
Tabata un preparacion completo, for di decoracion y e atributonan riba escenario, musica, naracion, contenido, pa trece un parti di nos tradicion cultural den forma di storia bibo, ilustrando nos folklore y cultura tocante celebracion di Dia di San Juan. Un biaha mas, por a scucha con nos hendenan tabata biba y entretene nan mes antes, unda cu a haci uzo di palabra, dicho y expresion di antes. “Esaki ta un forma excepcional cu Departamento di Cultura a uza, pa mantene nos tradicion y cultura bibo y asina nos muchanan haya sa di unda nan ta bin”, Ras a sigui bisa. Segun e parlamentario, realmente nos tin cu inculca orguyo y keda promove loke ta di nos, ya cu e funcion y educacion cultural na scol, ta loke ta defini como e centro cultural principal di su comunidad.
PROFESIONAL Y EDUCATIVO
Ras ta elogia e tremendo trabou y dedicacion cu henter e team dinamico di Departamento di Cultura a haci, pa pone e proyecto aki riba pia y realisa esaki den un forma hopi profesional y educativo. “Tempo ta cambia y historia ta sigui. Nos tin cu percura pa recupera of produci e sentido cultural di scol como un espacio di identidad, encuentro y recreacion cultural, basa riba multiculturalidad y interculturalidad, conhuntamento cu e partnernan clave manera Departamento di Cultura”, Ras a continua bisando. E ta mustra cu nos tin cu brinda oportunidad di expresion di diversidad cu ta caracterisa humanidad y e diferente contextonan cu ta desaroya su actividad di e gruponan social cu ta existi na scol y inculca respet pa cada un di nan. “Nos curiculo mester incorpora un vision intercultural den su practica, pa logra un influencia adecuado den e construccion di e identidadnan nacional, local y personal, creando participacion activo y consciente di henter sociedad den e educacion di e generacionnnan nobo y den nan preparacion pa bida. Ta autentico y no permiti pa loke nos antepasadonan a cultiva como nos historia, cultura y tradicion bay perdi y sali celebra nos Dia di San Juan en grandi,” Ras a finalisa bisando.
