Women’s Club of Aruba ta prepara pa su iniciativa “Walk for Gratitude”, un actividad cu ta busca reuni comunidad alrededor di gratitud, solidaridad y accion social.
Omaira Silva, miembro di Women’s Club of Aruba, a destaca e trayectoria di e organisacion y su compromiso pa aporta na desaroyo cultural y social di Aruba. Segun Silva, e club ta representa un ehempel di pasion y determinacion, cu e meta di contribui na cambio positivo y fortalece e ser humano den sociedad.
Lisi Werleman-Paris, tambe miembro di e organisacion, a splica cu e caminata no ta solamente un actividad fisico, sino un oportunidad pa comunidad uni, celebra loke ta agradecido y transforma e gratitud den accion.
E “Walk for Gratitude” lo tuma luga diasabra 28 di november, pa 5:30 pm, cu salida for di e Walkway dilanti di Coco Loco na Eagle Beach.
Emily Perret Gentil-Ras a duna mas informacion tocante e destino di e fondonan cu lo ta recauda. E a indica cu e actividad ta conecta cu un di e proyectonan mas importante di Women’s Club of Aruba, cual ta enfoca riba e muchanan di e famianan cu menos recurso. Como parti di e proyecto, e organisacion ta plania bisti mas cu 300 mucha durante luna di december, pa nan por celebra Pasco y fin di aña cu lo cual ta necesario.
Judella Jean D’or, Chair of Ways & Means di Women’s Club of Aruba, a invita comunidad pa participa hunto cu famia, amigonan y e bisiñanan. Pa participa, e interesadonan por cumpra un ticket di AWG: 10.-, cu tambe ta duna acceso n’e premionan di entrada y un premio final.
Women’s Club of Aruba ta haci un yamada na comunidad pa uni n’e iniciativa y contribui na un gesto di solidaridad durante e temporada di fin di aña.
Pa mas informacion, e organisacion por ta contacta na; 592-8400, 733-3317 of 592-2873.
“Steps of Gratitude” ta representa e deseo di Women’s Club of Aruba pa sigui traha hunto cu comunidad y transforma gratitud den un accion concreto pa hende cu tin menos recurso.
