Topcar y TOB ta prepara pa celebra 19 aña consecutivo di cooperacion y participacion hunto den e paradanan di Carnaval di Aruba. Segun Alvin Thijsen, Sales Manager di Topcar, e colaboracion a bira un tradicion importante p’e empresa y ta refleha e compromiso cu Carnaval como un parti esencial di cultura di Aruba.
Thijsen a destaca cu Topcar, como representante di Nissan y como empresa den sector di auto, ta sinti cu e cultura di auto tambe ta forma parti di e identidad di Aruba. E participacion den Carnaval ta un manera pa combina e dos mundo y sigui traha hunto como un ekipo.
Pa Carnaval 2027, Topcar ta prepara pa presenta e modelonan nobo cu lo forma parti di su participacion den e paradanan. Entre e novedadnan ta e Kia Seltos nobo y e Nissan Frontier nobo, cu ta forma parti di e oferta di e vehiculonan nobo cu Topcar ta introduci pa 2027.
Durante e evento, Eddy Stenebome, General Manager, a expresa su satisfaccion cu e colaboracion prolonga cu TOB. El a menciona cu e ocasion tambe ta marca e coronacion di e reinanan di TOB y a destaca cu pa Topcar ta un gran honor pa participa hunto cu TOB un aña mas den e paradanan.
Stenebome a invita publico pa disfruta di e actividadnan y di e temporada di Carnaval cu ta acercando. Cu 11 di november marcando e inicio di e temporada, Topcar ta prepara pa participa un biaha mas den e celebracion cu ta reuni comunidad, cultura y entretenimento.
Cu 19 aña di colaboracion, Topcar y TOB ta confirma un partnership cu a bira parti di e tradicion, di Aruba su Carnaval.
