Departamento di Impuesto tabata tey den e encuentro organisa pa DRH, cual tema tabata Liderazgo y integridad.
Directora di DIMP, sra. Luenne Gomez-Pieters a splica cu nan a sali hopi satifecho for di e conferencia. E tabata un conferencia cu a toca tema nan hopi interesante riba tereno di liderazgo y integridad, organisa pa DRH.
Tambe tabata tin presente sra. Amalin Flanegin di Banco Central, kende a wordo apunta como e persona pa setup e Bureau Integriteit Aruba.
Segun Pieters, mester cuminsa pa haci e topico di integridad discutibel. Loke ta integro pa un persona, no necesariamente ta integro pa un otro persona.
Pieters tabata tey presente y tambe e chefnan y teamleiders di DIMP. E ta haya cu ora ta trata maneho di e departamento y tambe e vision di e departamento, e vision tin cu wordo carga door di tur esnan cu ta den un posicion di liderazgo den e departamento.
Hopi biaha ta mira Pieters den frontline ta duna un entrevista, pero e departamento ta uno hopi grandi cu ta consisti di 260 trahado y 20 afdeling. Cada afdeling tin su chef of nan tin nan teamleider cu ta encarga cu e “daily operations”. Pieters ta reuni cada dos siman cu e Chef y Teamleiders di e departamento, caminda cu ta papia riba ehecucion di e empresa, entrada nan di impuesto y tambe riba topiconan manera training y topiconan cu ta toca personal di e departamento.
Integridad ta forma parti di e balornan di Departamento di Impuesto. Por bisa cu en general e presion ta halto cerka e funcionario publico cu ta traha na Departamento di Impuesto no solamente pa atende cu su trabao “zoals een goed ambtenaar betaamt” pero tambe pa duna e ehempel.
E palabra liderazgo naturalmente ta insera tambe integridad. Integridad den bo trabao, como ambtenaar. Un punto di atencion ta keda semper con bo ta dispone di por ehempel e inventario di Gobierno manera papel, ink, cosnan cu ta wordo confia nabo pa bo haci bo trabao.
Topiconan cu tambe mester wordo discuti ta por ehempel uso di email di trabao pa haci cosnan priva, uso di social media y uso di otro recursonan di gobierno pa atende cu cos nan priva. Mester por habri e combersacion ariba e topico nan aki mirando cu e ta asina importante. E aparato gubernamental mester por conta cu funcionario nan sincero y confiabel cu no ta haci cos nan cu ta danja e imago di bo mesun dienst y/of imago di bo collega nan, segun Pieters.
