SPA ta dicidido pa accion: A manda yama tur polis awe mainta pa reunion urgente

2870

Mientras cu den otro paisnan den Reino Hulandes ta honra polisnan cu extra “toelage” riba nan salario debi na e oranan iregular y largo cu nan a traha den pandemia, aki na Aruba ainda gobierno no por caba di concretisa locual nan mes a priminti. Minister mr. Andin Bikker a manda e sindicato di polis (SPA) un carta pidiendo pa poco mas pasenshi y cu otro aña por tin mas claridad riba e asunto aki. Polisnan sinembargo no kier tende mas y ta cla pa bay den accion durante e siman aki ainda di dianan di fiesta.

No por considera e posicion fuerte aki como un “presion net ora cu gobierno no tin placa”, asina un fuente den directiva di e sindicato a indica. Nan a splica cu for di comienso di e pandemia aki na luna di maart a canta gobierno riba e asunto aki, specialmente ora cu a corta den nan salario. A bin acerca e tempo ey cu tabatin diferente frontliners pasobra e mesun gobierno aki a permiti pa Dr. Horacio E. Oduber Hospital si a keda sin reduci salario di su trahadonan y a laga nan cobra “clean” te cu nan sindicato a gaba cu nan si a logra.

Na inicio di e luna aki, minister mr. Andin Bikker a skirbi un carta den cual el a indica cu no ta asina cu Corsou a haya un “pandemietoelage” sino a djis haya overtime. Tambe e mandatario a admiti cu departamento di recurso humano di gobierno (DRH) no ta cla cu un conseho pa e gratificacion aki cu polisnan ta bogando pe pasobra e lo crea prescedente pa otro ambtenaarnan cu tambe a traha den pandemia y ta considera nan mes tambe como frontliners.

Cu e carta aki riba mesa awo, sin un fecha fiho ainda pa haya un contesta positivo riba nan peticio te pa ricibi pago riba nan salario, a causa cu awe diamars pa 10:00am ta tuma luga un reunion di urgencia pa tur polis, den cual e sindicato kier haya un mandato cla di su miembronan riba e direccion cu nan kier bay. Un accion parce ta inevitabel e biaha aki, debi cu polisnan ta sinti cu mas bien gobierno kier cumpra tempo y keda sin paga nan.

Keda pendiente pa cobertura completo awe mainta for di e reunion entre polisnan miembro di e sindicato cu nan directiva. Chens ta grandi cu for di e reunion mes lo sali directamente pa Cocolishi pa ey informa Gabinete Wever-Croes di e posicion cu e polisnan a tuma y cu lo no hala atras tanten cu no keda cla cu locual Bikker mes a priminti cu el a pasa deen Conseho di Minister pa e polisnan.