George Vieira: Aruba no ta di ambientalistanan so

E aña’ki a surgi un situacion cu, banda di e pandemia, a afecta propietarionan di vehiculonan special manera UTV y ATV, cu turistanan (y localnan) ta uza pa keiro rond di Aruba. E fundacion cu ta consisti di propietarionan di e companianan aki, no a keda contento y a bay te dilanti mesa berde. Sinembargo no a haya rason. Awe nan kier a manda un mensahe y recorda cu “Aruba no ta di ambientalistanan so”.
George Vieira ta propietario di George Cycle Company y ta un miembro tambe di Aruba Offroad Foundation.
Pa cuminsa el a splica cu nan tabata confronta diferente problema individualmente cu operacion di nan compania. En bes di actua den forma individual, mas o menos 20 compania cu ta opera den e sector aki a dicidi cera cabes y lanta un fundacion cu e meta pa bini cu solucion cu tur hende por biba cu ne. Pa por yega na un areglo cu Parke Nacional. “E hendenan ey mes no tabata dispuesto pa dialoga, ni nada y nos a haya nos obliga di bay dilanti hues.

George Vieira: Aruba no ta di ambientalistanan so

George Vieira: Aruba no ta di ambientalistanan so. Click link pa mas https://24ora.news/3piSNei

Posted by 24ora on Tuesday, December 22, 2020

Lastimamente nos puntonan di solucion no a wordo balora. No a pone un tiki awa den biña pa nos tur por biba. Hasta decision di hues a dicta cu ATA no por propaganda piscina natural. Esey tabata hopi straño pa nos. Ora ta propaganda Aruba ta Natural Bridge y awo Natural Pool y e cuebanan.”
Offroad Foundation ta sinta na mesa cu ATA y AHATA pa mira cual ta e miho forma pa promove Aruba y su puntonan di atraccion.
No ta di awo ta papiando di e tema pa tur hende cana segun ley, for di 2007 caba, segun Vieira. Y awo tin un grupo di 20 compania cu a inverti hopi placa den e vehiculonan; gobierno ta haya entrada via di invoerrechten di nan, ora di keur, pago di e vergunningnan, salario, seguro, prestamo, etc. Ta hopi placa ta lora pa Aruba, no pa un grupo di cinco hende cu ta dirigi Parke Nacional. “Aruba mester ta di nos tur, no di un grupo di ambientalista so. Kico nan mes ta haci pa parhanan, cu excepcion di saca potret? Nada. Nan ta blo critica.”
Aruba Bird Life Conservation tin un cantidad di borchi cu nan a haya di unda tin choco. E ta puntra su mes pakico nan no ta haci un esfuerso pa pone e borchinan.
Tambe e ta pidi pa gobierno duna ordo na DOW pa marca, cu barancanan, e areanan patras di Aruba unda cu vehiculonan no mag pasa. Mescos cu a haci den parke. Ta evita esnan cu kier haci coy loco ta afecta e naturalesa.