E ultimo encuentro entre Team Snor y Team Sero Blanco a bay “suavemente bisa” na un manera catastrofal p’e equipo di Sero Blanco! Un 99 Bar & Restaurant pata pata di fanatico di bon domino tabata testigo ta con ta duna un sota den domino!
Team Snor a presenta cu mita team, mientras cu Sero Blanco a subi e unico Domino Square Garden na mundo cu full equipo cu e pensamento cu aki Snor ta bay haya! Pero cerca Snor, ora bo faya bo ta haya!
Den prome mita ya caba tabata bisto cu aki mester pasa un milagro pa Sero Blanco resusita! Den un rato di ora ya Snor tabata gana cu score di 7 – 0, pa despues yega half time cu’n bentaha amplio di 11 – 4!!
Den half time por a tende integrantenan di Snor comenta cu nan team ta demasiado fuerte pa Sero Blanco, pero Snor kermen awe ta dia cu su team ta bay duna “clinics”! Segundo tempo ta bay aden y cu trot den bom, Team Snor ta bay dilanti cu score di 17 – 4!! Un masacre ta na caminda shonnan, un berdadero masacre!
Manera semper den e super batayanan den Domino Square Garden, semper tin algo “spannend” ta sosode, y e biaha aki no tabata excepcion! Den e fanaticada tabata tin un guy cu fam “Lighthouse” tabata papia mas hopi cu’n prikichi ariba steroid!! Non stop un avalancha di palabra tabata sali for di su “speaker”! Pero, manera tur hende, e meneer aki de vez en cuando tambe mester bay baño. Ata! El a cera su mes den baño! Un accidente a causa di demasiado “vuurwater”? Un acto delibera? Esaki lo keda un misterio pa eternidad, pero echo ta cu pa casi mei ora el a keda grita den baño, mientras cu paz y trankilidad a bolbe reina den Domino Square Garden!
Mientras tanto, sin piedad, Snor a sigui suta manera nunca bisto y al final ta triunfa cu score implacabel di 21 – 7! Shonnan e temporada di “last lap” na 99 Bar & Restaurant a cuminsa hot hot! Keda pendiente shonnan pasobra t’awo ta bay tin co’!!
