Ilegalnan cu ta kedando na Guarda nos Costa na Sabana Berde a dicidi di protesta awe merdia contra esunnan cu ta cuida nan. Di parti Guarda nos Costa mester a pidi refuerso di Polis pa yuda nan cu e situacion pasobra algun di nan a dicidi di subi dak di e edificio pa haya atencion riba nan mal contento. Director di Guarda nos Costa, Trudy Hassell a sali splica riba e situacion cu a presenta.
Segun Hassell, rond di 1:00pm un grupo di un cel a kibra porta di e cel y na e momento ey ningun cuidado por a splica pakico nan ta haciendo esey. Despues e detenidonan a cuminsa lanta cu e cuidadonan. Motibo di nan protesta ta pasobra a saca un par di matras cu tabatin di mas den e celnan y a splica nan cu mester di e matrasnan pasobra tin mas persona ilegal cu ta bay drenta GNC y cu no tin mas. E personanan aki no a keda contento cu esey di cual algun di nan a uni y cuminsa haci desorden.
Actualmente tin falta di personal na GNC pero asina mes diariamente e hendenan aki ta haya espacio pa recrea y sali tuma aire pero no ta tur ora esaki ta e caso pa motibo cu algun di nan mester di atencion di dokter cu un cuidado acerca y debi cu tin falta di personal no ta tur cos ta logra manera kier.
Na GNC actualmente no por duna duna tur hende mey ora pa haci yamada na nan famia pasobra asina por asina ta bay keda di mainta tempran te 12’or di anochi ocupa cu e detenidonan y naturalmente esey no por. Na GNC tin un programa diario pa tur hende y mester por cumpli cu esaki y hasta pa e momento cu tur mester come.
Trudy Hassel a splica cu no ta tur ilegal ta esunnan cu a drenta como turista y a keda pero tambe tin un grupo grandi cu a bin for di KIA despues cu nan a sinta nan sentencia y tambe tin un grupo grandi cu a drenta clandesinamente cu boto. Conforme cu maneho no sa kende e hendenan aki ta y no sa tampoco kico ta nan background y nan no ta permiti pa haya meldplicht.
Director di GNC tambe a splica cu tur dia diligentemente ta evalua casonan ta cua persona por haya meldplicht, pero tin algun hende cu a yega di duna nan meldplicht y nunca mas nan a bay meld na GNC. Tin hende cu a sali cu garantia y e garantenan mes ta revoca e garantia di nan y nunca mas ta haya sa unda e personanan aki ta pasobra nan no ta bin meld.
Di parti GNC hopi biaha ta mustra e buena fe y kere den e persona pero hopi biaha ta keda defrauda den esey. Tambe ta evalua caso pa caso pasobra cada caso ta diferente na otro pa asina por saca conclusion kende por duna meldplicht. E situacion awor aki ta, cu frontera di Venezuela ta cera y ta dificulta e situacion cu no por deporta e ilegalnan.
Den caso di detenidonan cu a sali di KIA y cu a comete crimen no por duna nan meldplicht y ni tampoco esunnan cu a drenta Aruba clandestinamente cu boto pasobra no tin conocemento di nan pasado. E personanan aki no por bay den comunidad y e solucion no ta pa habri porta y laga tur hende bay pasobra GNC tin responsabilidad hopi grandi riba mantencion di orden publico y naturalmente mester proteha e pueblo. E situacion aki no tin nada di haci cu gobierno pero cu pais Venezuela cu ainda no a habri e posibilidad pa e personanan aki regresa nan pais. Tanten cu esey no sosode Aruba ta pega cu e situacion aki.
For di basta tempo ta trahando pa haya mas personal y Minister Bikker tambe ta trahando riba dje pa haya mas personal pa haci e trabou mas sigur cu loke ta haciendo awor. Ta tur dia Trudy Hassell ta comunica cu consulado di Venezuela y e contesta no ta yega y tur dia e ilegalnan kier tende esey for di dje. Siman pasa ainda Hassell a pidi consulado bin papia cu e Venezolanonan riba nan peticion na GNC, pero te ainda no tin ningun contesta cu e lo bin.
Trudy Hasssell ta lamenta e situacion y ta comprende e ilegalnan pasobra no ta un situacion facil y hopi di nan tin famia na Venezuela y ta preocupa pa nan famia. Actualmente ta deal cu e situacion y ta trata di haci nan estadia na GNC mas agradabel posibel.
Si tin miedo debi na Covid, tur hende cu ta cera na GNC ta Covid free, pasobra a bin cu medida for di tempo cu Covid a cuminsa pa grantisa salud di un y tur. No solamente di e ilegalnan pero tambe di e personal di GNC.
Directora di GNC ta haya cu violencia no ta logra nada y unico manera ta, pa mantene hopi pasenshi. Pronto lo bay haya mas personal y tambe sigura e edificionan di GNC. E preocupacion di Trudy Hassell ta siguridad di e personal pero e ta kere cu hunto mester bay busca un solucion. Na Guarda nos Costa tin regla pa tur hende y nan mester comporta nan mes bon y nechi.
