Mas y mas tin di atende cu situacion cu persona cu problema di comportacion, adiccion y/ of problema mental riba nos isla. Ta sinti cu cada dia e ta bira pio y no tin solucion structural pa maneha e problematica.
Polis ta haya nan diaramente enfrenta cu persona (nan) cu ta lanta cu famia, causa destruccion, haci daño na nan mes y ora situacion escala nan ta cuminsa bira un preocupacion serio pa famia of cualkier persona den nan cercania na momento cu nan lanta formalmente y cu intencion serio pa causa daño na otro hende.
Menasa di morto ta delito serio pero no tin manera pa atende cu e personanan aki, cu ta sufri di un of otro problema mental. Tin cu bay cu sumo cautela, den grupo y ta atento na cualkier movecion cu nan haci, pa asina no surgi un desgracia caminda hende lo por te asta perde nan bida. Cu lamentablemente ta algo cu a sosode caba y lo kier evita a todo costo di ripiti.
Den e caso di awe mainta, na altura di oficina di dokter Vallejo a presenta un persona ta menasa formalmente cu morto eyden. Esaki a pone cu nan a bati alarma mesora na autoridad pa bin duna nan un man.
E persona aki ta un conoci di polis pero na yegada el a bandona e oficina caba, a cuminsa un buskeda den e area y a bin encontra cu n’e den e parkinglot di ImSan bieu.
Detencion no a bay facil como cu el a resisti formalmente cu polis. Na mes momento, polis tambe a haya insulto y menasa di parti e persona aki caminda el a sigura cu na momento cu e sali di warda di polis, nan lo mira kico ta kico.
Asina mes a deten’e y transport’e warda pa continua e proceso.
