Recientemente a sali un potret unda e atleta Veronique Athens a gana y loke a hala atencion tabata e echo cu bandera di Aruba tabata poni abou. Aki tanto su persona como e otro atletanan tabata para riba dje na momento di saca potret. Esaki no a cay den bon tera.
E atleta mes a manda pidi su disculpa loke a pasa. “Mi kier a cuminsa na pidi un disculpa na e comunidad di Aruba cu mi a para cu mi pianan riba e bandera di Aruba. Mi no tabata totalmente consciente y al tanto na e momento ey di esaki y tabata feliz cu mi a gana e prome luga y di a haya e oportunidad di representa Aruba den un competencia internacional. Mi ta orguyoso di por competi bou di e bandera di Aruba como atleta den competencia internacional, e ta significa hopi pa mi. Nunca tabata mi intencion pa daña e bandera di Aruba paso e isla aki ta significa hopi pa mi. Mi mester a traha duro pa obtene e prome luga y tabata orguyoso di por a hiba e logro aki Aruba bek. Mi ta pidi mi disculpa un biaha mas pa loke a pasa y priminti cu e no lo pasa nunca mas”, atleta Veronique Athens a indica.
