Despues di a reuni den Wilhelminapark diahuebs, sindicatonan cu ta representa trahadonan den e aparato gubernamental a manda un carta pa Conseho di Minister, a base di un carta cu e ultimo aki a manda y e proposicion di gobierno riba un posibel forma con partidonan por yega na un acuerdo riba un adaptacion di salario basa riba aumento di costo di bida 2018, e sindicatonan ta informa lo siguiente.
Den e carta nan ta mustra cu di acuerdo cu peticion di gobierno como dunado di trabao, e sindicatonan a reuni cu su miembronan y a presenta e proposicion di nan dunado di trabao su pro y contranan, su efecto riba cada grupo cu e sindicatonan ta representa.
E proposicion aki di Gobierno di Aruba, a wordo rechasa completamente pa miembronan den un forma unanime. Sindicatonan na su turno a hasta haci un intento pa presenta un posibel contra-proposicion di nan banda, cual a wordo rechasa pa mayoria.
Pa e motibo aki tambe, Sindicatonan, den nomber di e empleadonan publico ta informa Conseho di Minister cu Sindicatonan ta keda para riba nan carta fecha dia 5 di november 2019 y ta insisti riba nan proposicion pa un ahustacion di 101 florin riba salario di trahadonan pa entrante 1 di januari 2019.
Sindicatonan ta duna oportunidad na Gobierno di Aruba pa un contesta positivo of alo menos bin na mesa cu un proposicion husto cu por negosha realmente prome cu diamars 26 di november 2019 pa 12’or di merdia.
