For di nos coresponsalnan na Den Haag, 24ora.com a compronde cu e situacion financiero di Pais Aruba no ta e preocupacion di mas grandi di e Parlamentarionan di Hulanda y ni di e Ministernan di Hulanda. Tampoco e trayecto cu Gabinetenan di Eman y di Wever-Croes ta canando desde 2014 pa awo hunto cu CAft pa cambia e panorama financiero di Gobierno.

Cu e crecemento economico premira y su reflexion den finanzas publico no a materialisa pa motibo cu e inversionnan den e refineria no a tuma luga, ta un hecho cu Gobierno di ambos signatura lo mester a enfrenta. E problema real ta e blunder politico di Rocco Tjon, cu a kere cu a purba “changa” Hulanda den un amienda presenta riba e ley di supervision financiero di LAft. Pa Hulanda esey a causa un DESCONFIANSA den Gabinete Wever-Croes cu ta acorda algo den protocol pero ta permiti cu partidonan den coalicion haci otro den Parlamento y pa esey…e “aanwijzing” lo a bin.

Rocco Tjon no tin un idea di kico el a causa aki

Rocco Tjon, cu mama di su yiu muhe a acus’e 9 aña pasa di pedofiel, a drenta politica na aña 2017, despues di sali for di Polis y a asumi e puesto di Director di KIA. El a haya mas voto cu Andin Bikker mes den eleccion, pero pa tin coalicion a hay’e ta acepta un funcion den Parlamento pa Bikker bira Minister. Y algun luna pasa, yuda pa Presidente di Parlamento, mr. Juan “Ady” Thijsen, a purba pasa Hulanda un “fastball” cu mesora a cambia e relacion entre Den Haag y Oranjestad y a bira e motibo di tur dolor di cabes cu Minister Presidente Evelyn Wever-Croes tin awe cu Minister Raymond Knops y cu henter Gobierno di Reino Hulandes. 

Ken lo perde cara? Knops of Tjon?

E pregunta awor ta: Kico a acorda cu Hulanda? E lo ta cu Wever mester laga Tjon cay y push’e pa pasa e ley di LAft den Parlamento manera cu e tabata antes? Si esey sosode, Rocco Tjon por tuma retiro tambe pasobra su bluff no a funciona y politicamente e lo ta morto tambe. E lo nifica cu e mesun mayoria den Parlamento cu a pasa Hulanda un “fastball” lo mester pasa un ley bek pa corigi nan mesun blunder politico. Ta cu ki cara? Pero sin cambia e ley ey, Hulanda lo no kier tende nada y lo firma e Aanwijzing cu tin tres luna caba riba lessenaar di SM Rey Willem Alexander na Den Haag. 

Tin motibo pa celebra awe?

Fanaticonan politico y coordinadornan den Cocolishi ta celebrando cu Aruba no a haya un “aanwijzing” of un “KB” manera cu Gobierno di Reino Hulandes y cu CAft a menasa cune pa lunanan tras di otro. Minister Raymond Knops a bisa enfaticamente cu e “Aanwijzing” ta keda riba mesa pa dos luna mas y si na januari 2020 Aruba no a cumpli, lo bay over ehecuta esaki manera cu e la ser presenta awemainta den Conseho di Minister di Reino. Esaki ta ensera cu pa januari 2020 e presupuesto mester a wordo aproba den Parlamento y CAft lo mester duna tambe su conseho. Ora tur hende a opta pa celebra e “logro”, poco a puntra nan mes a costo di kico a yega na e acuerdo. Kico ta e consecuencianan? Ki commitment Minister Presidente Evelyn Wever-Croes a hasi den nomber di su partido y partnernan den coalicion? Ki medida lo bin pa nos por tin un presupuesto balansa y cu un “surplus”? Pa yega e deadline di januari 2020 nos ta laat caba, mirando e trayectoria cu e ley di presupuesto mester pasa despues di tratamento den Parlamento? Esaki por inclui un recomendacion pa entrega un presupuesto 2020 di nobo.

Lomanda algun empleado cas

Un di e prome retonan ta pa mantene e presupuesto di empleadonan publico na 479 miyon florin pa otro aña. E ta dos reto pasobra ya caba a surpas’e cu e hendenan nobo cu a emplea bou capa di Sociaal Crisisplan, cu awor lo mester bay cas. E otro ta pasobra sindicatonan ta demandando indexering, cu tampoco ta riba presupuesto di otro aña. Gobierno lo por logra convence e sindicatonan cu awor no ta prudente pa duna aumento? Gobierno ta goza di confiansa di empleadonan publico cu nan no a yena e luga cu coordinadornan pa awo pidi empleadonan publico pa hala faha mara? 

Permiso pa cultiva y exporta marihuana

Aunke cu mayoria partido politico a bisa di ta na fabor pa legalisa cannabis medicinal, e pregunta cardinal ta si e “achterban” di AVP y MEP lo aproba e asunto aki. Tin un asunto di interpretacion tambe pasobra e partidonan tradicional ta papia di aproba e uzo medicinal mientras ta crea e impresion cu lo duna permiso pa cultiva na Aruba y bende cu un compania Canades den Freezone pa exporta. Pa haci esaki lo mester haci esey posibel den nos ley penal, cu tur consecuencia. Sindicato di Polis (SPA) a vocifera caba di ta contra legalisacion di marihuana. Gobierno ta premira cu nan lo cobra 10 miyon florin otro aña na permiso pa cultivacion y exportacion. 

Lo baha presupuesto di mercadeo di turismo

Un otro forma pa haya mas fondo den caha di Gobierno ta dor di limita e presupuesto di Aruba Tourism Authority cu 30 of 35 miyon florin den aña 2020. Tanto ATA como AHATA a expresa nan preocupacion pa e decision aki pero e ta forma parti di e plan pa logra mas entrada pa cubri presupuesto di otro aña. 

Ley di casino

Un otro cambio lo ta den ley di casino den cual nan lo mester paga mas pa nan operacionnan. Den esey lo cobra pa cambia florin pa dollars, lo cobra mas pa hunga den casino pa cual lo por spera cu casinonan ta pasa algun di e gastonan aki pa e hungadonan. Den esey algun casino a bisa adelanta caba cu si Parlamento pasa e ley, cu tin lunanan wanta, cu algun lo cera mesora. 

Reforma Fiscal: Awo si?

Un otro promesa cu Wever-Croes a haci Knops ta cu lo ehecuta e reforma fiscal, e di dos rond. Kico esey ta nifica? Ningun hende no sa mas, pasobra el a cambia tanto biaha caba cu a perde e escencia. Lo bin sugartax? Lo hisa BBO? Lo cobra BBO na frontera ora di importa? Lo bin cu impuesto pa hotelnan y otro companianan grandi cu sede afo? Lo bin cu e leynan pa cobra impuesto pa Serlimar? Lo ehecuta e cambio di IMF pa cobra BTW na 10% enbes di BBO? Ta contestanan cu mester bin awo, e luna aki ainda pa Parlamento aproba den e siguiente simannan pa asina nan por drenta na vigor dia 1 di januari 2020, sino Hulanda ta tuma medida na januari 2020. E pregunta: Tin sosten politico den coalicion? 

Celebracion na Den Haag no ta refleha na Oranjestad

Ta pesey ta bisa cu e celebracion cu tin awe na Den Haag cu e “logro” aki lo no sosode mesun cos na Oranjestad. Aki comunidad mester prepara pa un lista di “ahustacion” cu sin duda lo haya hopi nomber bunita pa no yama nan medida. E lo bira un asunto di hala faha mara. AVP lo culpa MEP cu a hisa nan presupuesto cu 100 miyon pa tuma mas hende y complace Friends & Family, entre otro abogado Hendrik Croes y Anthony Ruiz. MEP di otro banda lo culpa AVP di a hinca pueblo den debe grandi cu renobacion di Oranjestad, Hospital, construccion di Green Corridor, Watty Vos Boulevard y MFA nan nobo. Pero na final, ken cu ta culpabel, ta NOS lo mestes paga tur debe awo! 

Comments

comments