E sindicatonan SEPPA, SIMAR, SPA, SADA y FTA a tuma nota di e carta di 5 di januari 2022 di minister-president. E sindicatonan menciona ta di opinion cu un compensacion husto pa reduccion di salario (incluyendo beneficionan) di 12.6% mester ta un reduccion den e orarionan di trabou pa un percentahe igual. Den e caso aki Gobierno no por exigi cu e trahado ta traha e mesun cantidad di ora pero ta ricibi menos pago pa esaki.
Ta remarcabel cu Gobierno a permiti y te hasta impone esaki den sector priva caminda cu e reduccion den salario a bay man den man cu un reduccion den oranan di trabou. Lo ta inconsistente y un abuso di poder si gobierno ta impone esaki na otronan y no na su mes. (Red: Ta bon pa menciona cu na WEB a acepta esaki tambe, esta cu trahadonan ta entrega parti di salario/beneficio a cambio di extra dia liber pa luna. WEB ta un compania estatal cu ta pertenece na Gobierno di Aruba)
Pa remarca, awor cu no por reduci oranan unilatermente, ta remarcabel tambe cu desde inicio (1 di mei 2020) gobierno si a haya ta bon pa unilateralmente reduci e salario die trahadonan. Den esaki mester tin tambe igualdad den trato.
Si Gobierno su reaccion lo ta pa retene atrobe un parti di salario di e trahado cu lo traha 12.6% menos, esaki lo forma un sancion desproporcional, inaceptabel y inhusto. Forsosamente e sindicatonan lo mester bay tuma accionnan legal y/o laboral den tal caso.
Finalmente nos kier atende Gobierno riba articulo 8 di e Landsverordening tijdelijke versobering bezoldigingen en voorzieningen overheid, cu ta encera un obligacion di gobierno pa entrega un relato por escrito di efectividad di e reduccion temporal di salario, pa asina tambe e trahado cu a entrega (forsosamente) parti di su salario, por mira e efectividad di esaki.
For di esaki tambe lo por deduci si y pa cuanto tempo mas y den ki grado lo mester continua cu e reduccion (of no). Gobierno no a cumpli cu e obligacion legal aki, cual sindicatonan ta bolbe exigi pa cumpli cu esaki.
Nos ta mantene nos posicion cu a keda vocifera den carta di dia 5 di januari 2022. Sperando di a informa suficiente, nos ta keda en espera di un reaccion.
