Un accidente cu lo bay costa basta pa drecha e vehiculo bek. A tuma auto presta sin cu e doño a duna permiso y a hay’e den un tremendo problema awo. Diahuebs atardi, den careda di 3:00pm, habitantenan a tende un desordo fuerte pafo, ora a sali, a bin topa nan auto cu tabata staciona, cu daño material grandi. E auto a bay para un bon distancia leu for di caminda e tabata para.
Esaki a sosode dilanti Maracastraat 29 na Dakota, caminda un chauffeur coriendo un Suzuki Liana A- 50312 pasando den e caya ey, a hala incomprediblemente na su banda drechi y bay impacta den e Nissan March staciona dilanti e cas.
Manera menciona, afortunadamente e Nissan March no tabatin ningun hende e momento ey aden. Mientrastanto e chauffeur di e Suzuki Liana a sali for di e auto y tabata cana rond bay bin. E no tabata mustra herida. Situacion un rato despues a bira tensa, na momento cu familiarnan a yega sitio y cuminsa insulta e chauffeur di a bay cu e vehiculo sin permiso di e doño cu al parecer ta nan mama.
Por observa cu e daño material ta grandi, ningun di e auto nan por a move riba nan mes forsa mas y mester a warda takelwagen pa transportanan.
