Sindicato di Maestronan Aruba (SIMAR) por medio di su presidente Josephine Albertus y dos persona a reuni cu prome minister Wever Croes riba e falta di pago di overtime di docentenan di Colegio San Nicolas. E reunion a dura mas o menos un ora mientras miembronan bisti na preto tabata warda pafo.
Na salida Albertus a bisa cu e lesnan extra aki ta necesario pa e studiantenan y a keda demostra cu sin esaki nan ta faya. E docentenan no por wanta mas y kier nan pago. Hustamente pasobra nan ta fada, no kier sinta mas cu minister di enseñansa mes.
Albertus a enfatisa cu ta trata aki di oranan cu e docentenan a traha, no oranan extra. Den enseñansa no ta haya pago di 150% sino 100% y ta e oranan aki ta esnan cu e docentenan no a haya nan pago. Ta oranan cu si no cumpli cu nan, lo perhudica e alumnonan di Colegio San Nicolas. E oranan aki ta yuda e studiantenan cu e vak cu nan ta swak den dje.
Awo pa colmo a haya un menasa cu si nan no traha e oranan ey, nan lo no haya nan pago. Ta sinti cu e ta un sistema di intimidacion, mas ainda si mira cu otro scolnan tambe a haya carta cu si nan acudi na e reunion di SIMAR riba tema aki, lo no haya pago di e ora ey di trabou. Esaki ta algo cu no ta necesario, segun presidente di SIMAR, pasobra no a invita nan pa e reunion.
E sindicalista tabatin masha elogio pa prome minister, kende a priminti di lo bay combersa y wak pa nan haya e pago e luna aki.
E tardansa ta algo cu no por, ta un falta di un respet pa educadornan. E ta algo cu a haya suficiente tempo pa drecha e situacion. Nan no ta kere cu e ta un fayo administrativo pasobra a haya carta den cual ta bisa cu no ta paga nan esaki. E carta di 16 di october a bini di Management Team di DPS (Directie Publieke Scholen). SIMAR a sinta caba cu minister di enseñansa cu 9 punto di agenda, pero no a finalisa cu tur punto y e reunion ta sigui awe tardi, cu ta inclui e tema di overtime di Colegio San Nicolas.
