Den e conferencia di prensa di partido RED awe a papia di e reunion di miembro cu a tuma luga den fin. Pero tambe a hiba palabra lider di partido Ricardo Croes. Aki el a menciona cu e tabata un biaha mas blanco di menasa.
El a expresa di ta sumamente desapunta cu despues di tur e problemanan den politica, el a ricibi un menasa, inclusive contra su famia. “No ta prome biaha cu mi ta haya menasa. Nan a yega di kita tur not di e tirenan di mi auto na cas. Hendenan ta grita “wak bo no cana bo so”,” ta algun di e menasanan cu el a ricibi y di tur esnan cu el a sinti cu ta un peligro of ta real, a haci entrega di keho.
E ta kere cu tur e menasanan aki ta sosode pa motibo cu nan no por haya nada malo contra dje. “Tabata masha desagradabel scucha e menasanan aki.”
El a papia di e cambio cu pueblo a scoge p’e na 2017, pa bini cu un coalicion enbes di un solo partido, cu por mira como casi un dictadura.
Croes a bisa cu ora tin diferencia di opinion, semper mester wak interes general di pais Aruba. Pero den e dianan aki el a mira cu politica tradicionalista ta sigui existi, gaña, pa sirbi un proposito cu no ta interes general. “Un matrimonio no por core divorcio cu e prome problema. Mester wak interes general (famia),” Croes a expresa.
Pa loke ta e problema di algun luna caba den Gobierno y coalicion, tambe el a duna su comentario. El a bisa cu hasta el a yega di haya invitacion pa reunion pa benta Gobierno abou. “Ami ta sirbi interes di mi pais. Nos tin un acuerdo cu MEP y POR pa un Gobierno. Y den un acuerdo asina, democracia mester prevalece tambe.
Aunke cu e no tin problema cu ex minister Marisol Lopez Tromp, e no por ignora cu mayoria ta bisa di no por traha cu e politico. El a enfatisa cu el a sali pafo dia di e reunion den Parlamento riba e piscadonan, pasobra e procedura no tabata corecto. “Ami personalmente no tin problema cu sra. Marisol Lopez,” el a enfatisa.