Tabata e intencion di FTA pa join e lucha di indexering. Awo ta memey di februari di 2020. Awo e pregunta ta keda si e cos a bay den un silencio of ta wardando, si e ta necesario si of no, of ta warda pa un siguiente gobernacion.
Hubert Dirksz, presidente di FTA, a splica cu berdad e miembronan di e sindicato a exigi esey. FTA no ta manera hopi ta pensa, cu no tin miembro den e aparato gubernamental. FTA tin un cantidad di miembro den e caso aki.
Gran parti di e trahadonan di Cuerpo Especial Arubano (CEA) y tambe varios Fundacion cu ta depende di e beneficio aki, cu si bin pago di indexering, ahustacion di salario, nan tambe tin derecho riba dje.
A combersa cu algun di e sindicatonan. FTA no por hinca su mes den e grupo. Ta spera cu nan ta wordo invita pa participa. FTA ta bay tin congreso den e proximo lunanan aki y esey lo wordo atendi den e congreso.
Si FTA mester bay hiba un lucha su so esaki, e lo mester haci’e e ora. Directiva di e sindicato ta na altura. Nan ta kere cu indexering mescos cu sector priva, ta yam’e den CAOnan, ahustacion di salario basa riba aumento di costo di bida. E sindicato ta kere cu e mester wordo atendi, pero pa hopi aña no a discuti kico ta e formula, kico ta e miho manera con pa bo haya bek e poder di compra cu ta perde.
Tin diferente situacion cu si ta bay p’adilanti den salario, bo no ta perdiendo poder di compra. Pero poder di compra ora bo salario ta un caminda y e costo di bida ta subi y abo ta cay atras.
Tambe bo tin esnan cu tin salario halto y esnan cu tin salario abao. E miho formula cu mester tin pa atende cu e problema aki no a wordo discuti. E sindicato ta spera cu tin informacion por ehempel cu GOA lo por bin na bida bek, un organo caminda cu sindicatonan por sinta na mesa cu gobierno, cu e puntonan aki por ser atendi y cu por haya e formula corecto.
Pero ta un derecho cu trahadonan mester di dje y ta spera cu ohala, den e caso aki sindicatonan cu tin e lucha ta hibando pa varios luna caba, si nan haya ta bon pa envolve FTA, sigur nan lo participa den e grupo aki.
Pidiendo pa indexering
Segun Dirksz, manera cu un trahado reacciona, haci peticion riba e necesidad pa wordo considera nan derecho riba indexering, tur otro trahado ta haci esey tambe. No sector publico so, pero sector priva tambe y den e caso aki logico cu miembronan di FTA tambe a reacciona, na momento cu un grupo di sindicato a haci un peticion na gobierno.
Y no por sconde cu e bida na Aruba ta caro. Esey ta haci cu sigur esnan cu salarionan mas abao ta roga pa esaki. Si e belasting no ta wordo cobra mesun cos pa esnan cu entrada abao, esey ta un bentaha, menos belasting, menos loonbelasting ta yuda den e caso aki. Pero toch esnan cu ta paga belasting, cu ta cay net un poco riba e belasting vrijevoet, esey ta bira un problema pa nan.
Automaticamente na momento cu tin un aumento di costo di bida y e situacion ta empeora, tendencianan, papiamento ta bay den comunidad, cu tin situacion financiero dificil na nivel familiar y cu tin e posibilidad pa haya indexering, e trahado ta lucha pa su derecho. Esey ta loke cu tin riba mesa y FTA ta kere cu partidonan, tanto gobierno y sindicatonan mester bin hunto y yega na un solucion pa esaki.
Den sector priva, ta purba tambe, mesun cos y den sector priva tin caminda cu bo ta logra y tin caminda no. Sector priva tambe ta kehando. Pa e motibo ey dificilmente ta ahusta e salario basa riba aumento di costo di bida.
Pero tambe ta un situacion cu mester atende, e presidente di FTA ta bisa.
