Telefon pa Hubentud, 131, tin tres proyecto den e temporada aki. Haciendo e proyectonan aki, nan ta sigui traha di cerca cu e hobennan den e parti preventivo.
Shurman Milliard, trahado social di Telefon pa Hubentud, a splica cu nan ta sigui traha tur dia na bienestar di e hobennan di Aruba. N’e number di telefon 131 e yamadanan ta sigui drenta. Door di tin contacto cu e hobennan, nan por sigui traha preventivo. Telefon pa Hubentud ta ataca e problemanan prome cu nan bira mas grandi y escala.
P’esey nan ta traha cu diferente partner. Den temporada di carnaval nan a cuminsa y e cosnan a bay tremendo. Milliard a indica cu tabatin hopi preocupacion riba peer pressure, presion di grupo, con “ami mester comporta mi mes den nos comunidad den un temporada diferente.” Esey tabata hopi n’e yamadanan cu nan a ricibi.
Banda di esey nan ta cuminsa cu tres diferente proyecto. Un di e proyectonan nan a cuminsa cu ne dos aña pasa y ta ripiti esaki cual ta ‘Best Dad Ever.’ E proyecto aki tin di haber cu e tatanan cu kier participa y ta desea di tin mas conocemento di nan yiu, con pa informa, kier informacion pa nan mes, specialmente con nan ta den nan famia y bira esaki den un manera positivo.
E proyecto aki ta uno internacional. Telefon pa Hubentud a duna informacion na Statia, Saba. Boneiro y St. Maarten tabata esunnan prome cu a haya esaki. Segun Milliard, nan lo keda ripiti esaki.
E di dos proyecto ta “Uit stopt het” y esaki tin di haber cu nan ta traha hunto cu HIAS. HIAS ta un fundacion cu t’ey pa hende cu mester extra yudansa, pasobra nan ta recien na Aruba of ta temporario aki. Hopi bes ta hende di diferente pais cerca y cu mester di yudansa den cuido. Telefon pa Hubentud a traha cu HIAS den e proyecto contra violencia, esta tur forma manera violencia na cas, violencia verbal, entre otro.
A bishita e scolnan basico cuater biaha caba. Nan ta bishita e klas di vierde te zesde, segun Milliard. Aki ta informa e hobennan riba violencia, tur e formanan y con nan por laga esaki bira menos.
E ultimo proyecto cu nan tin p’e temporada aki ta ‘My Story.’ E proyecto aki ta uno nobo y e aña aki ta prome bes cu nan ta hacie. E proyecto aki ta contra violencia di hende di afo. Esaki ta pa hende cu a bishita Aruba y tur dia ta mira discriminacion.
Telefon pa Hubentud tin diesseis hoben cu lo haci bishita e bida di otro. Segun Milliard, nan tin e parti den ocho team di dos y asina aki un ta bishita otro na cas. Asina ey e hoben local por mira un dia kico tur e persona cu bin afo ta pasa aden. Tur e interactuacion cu ta tuma luga na cas, entre e mayornan, tur esey ta bin bek den ‘My Story’ di e participante.
Banda di esey nan ta traha cu arte pa mustra kico nan a siña durante e bishita haci. Tambe Telefon pa Hubentud lo traha un pelicula cortico pa comunidad por mira con e ta pa bishita otro persona, otro nacionalidad, otro religion.
