Shirley Geerman a cuminsa traha na Censo dia 26 augustus 1975, tempo cu Aruba no tabatin ni 60.000 habitante, manera semper e mes ta bisa. Un trayectoria di 43 aña di servicio publico impresionante, cu mester aprecia y duna respet. E siman aki e empleado a despedi di su coleganan, pa bay disfruta di un pensioen bon mereci.
“Mi sa cu e no tabata facil pa Shirley cu a traha na un manera pa 34 aña largo, pasa den un trayecto di cambio, proyectonan y vision nobo e ultimo añanan, pero semper el a stima su kantoor y tabata kier tur cos bon pa Censo, esey a bin na prome luga. Pues cu un respet mutuo y bienestar di nos organisacion na prome luga, hunto por a logra hopi cos bon pa Censo”, asina mr. Sharin Luydens, Director di Censo a duna di conoce den su discurso di despedida.
E director di e departamento cu tanto a progresa e ultimo añanan den e nivel di servicio cu e ta ofrece, a sigura cu tur empleado por ta orguyoso y Shirley tambe por ta orguyoso cu e ta bay laga su kantoor den un bon rumbo.
“Shirley, e ta un dia tristo pero mi ta sumamente gradici pa tur locual bo a nifica pa mi y pa Censo. Ni maske nos sa tin biaha cu e tempo a yega pa bay cas, e no ta facil si bo a traha tanto tempo cu un hende, cual diferencia di opinion cu por tin, semper a duna bo un sosten incondicional. Mi sa cu hopi di nos coleganan no lo haya falta di e zundra pero si di Bo persona…Shirley…permitimi na nomber di Land Aruba, den nomber di tur e personal di Censo y particularmente mi persona bisa Bo masha masha danki pa e añanan di servicio y lealtad. Disfruta di bo pensioen”.
