Como pais nos mester sigui concentra mas y mas na prevencion. Ultimo tempo nos por a tuma nota cu atrobe ta lanta e deseo di sociedad pa castigonan mas pisa pa abuso di mucha. E castigonan cu na 2020 ya a keda aumenta. Porta esunnan cu ta indica of pidi pa esaki a lubida of no a tuma nota di e aumentonan cu ya a tuma luga.
Prevencion ta cuminsa na cas
Emocionalmente castigo halto of pisa por duna nos un sentido di satisfaccion cu husticia a prevalece. Pero realidad ta, cu nos no a resolve e problema na su rais. Nos problemanan social ta hopi mas profundo cu nos ta pensa y dificilmente por garantisa 100% di proteccion. P’esey mes mi ta convenci cu tur cos ta cuminsa na cas, como mayor nos mester ta mas atento y alerto pa cu e comportacion y/of señalnan di nos yiu y asumi nos responsabilidad di percura pa bo yiu(nan) semper ta den un ambiente di siguridad.
Un estudio a demostra cu 99% di casonan di abuso sexual di mucha ta cometi door di un miembro di famia of un conoci (e abusado). Prevencion ta den nos propio man y akinan e rol di Gobierno y e profesionalnan ta minimo. Parlamento, Gobierno y profesionalnan a bin ta tuma hopi accion y pasonan den e ultimo 7 aña riba diferente tereno: e ley- (e castigonan) y proceduranan a bin na vigor of mehora/aumenta, e departamentonan tabata institui, e departamentonan mester traha den un forma integral cu otro, diferente training y curso tabata duna y tambe (t)a traha(ndo) hopi riba e tereno di prevencion, educacion y cuido di victima.
Abuso number 1 na Aruba: negligencia di mucha!
Mi ta sostene tur e bosnan cu ta sali pa pone un stop na abuso di mucha, pa nos tur sigui para hunto y pone un stop na e abuso number 1 di mucha na Aruba cu ta: negligencia!
Y aki ta cada un di nos como mayor tin cu carga nos responsabilidad. No ta tarea di Gobierno of Parlamento so pa traha pa stop abuso di mucha. Negligencia tambe ta traumatico pa e mucha y ta limite den su desaroyo y ta strob’e pa ta feliz. Nos mester bira mas consciente di tur e consecuencianan cu cualkier tipo di abuso di mucha tin riba e bida completo di nos muchanan.
Educacion y conscientisacion ta esencial cerca nos muchanan
Parti esencial di prevencion mester ta educacion y empoderacion di nos muchanan. Nos mester sigui educa intensivamente nos muchanan mas habri y dirigi tocante nan salud sexual, abuso di mucha y haci esakinan ‘bespreekbaar’ for di chikito na cas, na scol y den comunidad. P’esey mi ta sostene proyectonan escolar cu tin caba riba e tereno aki y tambe e campaña nacional Mi Mesun Heroe cu Gobierno a lansa na 2022. ‘Mi Mesun Heroe’ ta un campaña nacional contra di abuso di mucha den forma di un serie cu 52 episodio y tambe tin diferente cancion y videoclip traha riba e topico. Un campaña pa empodera y conscientisa nos mucha- y hobennan.
Algun proyecto di prevencion di abuso di mucha
Otro proyectonan cu Gobierno a bin cu nan riba e tereno di prevencion ta entre otro e Codigo di Proteccion cu a wordo aproba na 2019 y a drenta na vigor na 2021. Codigo di Proteccion ta un sistema di proteccion di 5 paso pa e profesionalnan (riba tereno hudicial, social, salubridad y enseñansa) aplica na momento cu tin sospecho di abuso di mucha di 0 te 18 aña (https://www.codigodiproteccion.com/).
Tambe desde 2019 ta ofrece e training di Signs of Safety. Via e training aki a leid op tur persona cu ta traha cu mucha den e cadena social, hudicial, enseñansa y salubridad pa asina e persona por reconoce y bay om (tecnicanan) cu un caso di abuso di mucha y tambe con y unda pa raporta esaki. Alabes por menciona cu Gobierno a introduci Intervencion Trempan (DMH) cu ta un sistema cu ta brinda apoyo, sosten y guia na tanto e Centro di Cuido di Mucha, e mucha cu necesidad special como tambe e mayornan, ora ta señala un necesidad special cerca e muchanan, cu ta atende un Centro di Cuido di Mucha.
Esakinan sigur ta ehempel cu gobierno ta tuma e pasonan necesario pa traha riba prevencion di abuso di mucha. Pero tambe mester subraya cu a percura tambe cu si abuso a tuma luga e cuido di e victima bay mas miho posibel, pa entre otro e investigacion ta mas completo posibel (por ehempel raporta corectamente, compila pruebanan na tempo y segun procedura, interoga haciendo e preguntanan corecto) pa asina hues por castiga e abusado cu un sentencia mas pisa. Cu otro palabra simultaneamente a bin ta traha riba diferente tereno y aspecto.
Abuso di mucha ta un problema cu hunto nos tin cu soluciona. E ta cuminsa cu responsabilidad, ta keda na cada un di nos pa asumi nos responsabilidad y haci tur loke ta necesario pa para y preveni abuso di mucha.
