Falta practicamente tres parada pa por finalisa e temporada di carnaval y manera tur aña Servicio di Ambulance ta prepara pa brinda servicio caminda cu ta necesario, segun Liberato Hoek, hefe di Servicio di Ambulance di Instituto Medico San Nicolas (ImSan).
Ademas di e tres postnan normal cu tin pafo di e rutanan, lo staciona tres vehiculo di ambulance riba e ruta di carnaval, cualnan ta staciona riba puntonan strategico pa brinda e servicio na momento cu esaki ta necesario. Den cuadro di esaki, un biaha mas nan ta pidi cooperacion pa hendenan laga e crusadanan aki habri pa asina cu por yega riba e ruta.
Problemanan cu por haya
Segun Hoek, pa e parti di problemanan medico, hopi biaha loke nan ta keda confronta cun’e ta personanan cu ta bira malo. E por ta hendenan cu por ehempel cu por ta sufri di malesanan cronico, cu no a tuma nan remedi of no a come y banda di esey hendenan cu cay sea kibra algo of haya corta.
E otro problema cu sa haya hopi biaha, ta cu e crusadanan ta wordo blokea door di otro autonan. E ora no por yega facil na nan post riba e ruta. Pa duna un ehempel, Fort Zoutman ta unda cu hopi biaha sa tin problema y eynan cu hendenan ta blokia e caminda. No mester lubida cu otro banda tin hotel cu si algo pasa mester por yega eynan. E no ta conta solamente pa ambulance, pero tambe pa brandweer y te hasta polis.
E postnan
Tin post na e crusada di Banco di Caribe. Despues na e crusada di George Madurostraat/Vondellaan, tin na rotonde di Las Americas, tin uno na e crusada di LG Smith Boulevard/Adriaan Lacle Boulevard. Tin uno tambe den Irenestraat, p’abao di e edificio piramide. Tin uno na Fort Zoutman y e ultimo ta p’abao di Royal Plaza.
Ora di emergencia
Segun Liberato Hoek, si compara añanan anterior, e aña aki te ainda ta basta rustig. Pero falta e ultimo dos eventonan grandi. Na momento cu tin un incidente cu e personal di ambulance ta bezig cu un pashent, ta pidi publico duna espacio pa nan por haci nan trabao. E ta conta tambe pa miembronan di Cruz Cora.
Hopi melding ta bay via 911. Pero Carnaval tin un comando kamer hunto cu polis na Macuarima. Tur melding cu tin di haber cu e ruta di carnaval, ta bay pa comando kamer. Comando kamer na su turno ta percura pa manda un hende di Cruz Cora prome pa wak e situacion. Si ta necesario cu mester di un ambulance, e ambulance ta bin aden pa esaki. Ta depende di e tipo di emergencia cu tin den e caso aki.
Hoek ta sigui splica cu durante parada hopi biaha loke ta haya ta hendenan ta pidi pa pleister. Door di cana ariba abao, cierto momento si e sapato no ta adecuado, ta feila e pianan. P’esey hopi biaha ta pidi pa pleister. Tambe ta pidi pa pildonan pa dolor. Pero mester corda cu Ambulance no ta core cu pildo y nan no tin medicamentonan avansa. Hopi biaha miembronan di Cruz Cora ta wordo acerca pa esakinan.
Tips
Recomendacion di ambulance ta pa e publico ta hopi cauteloso. Principalmente den trafico ora bo ta bayendo cas despues di parada. Bisti bo faha di siguridad, si bo ta bay stuur, no bebe, percura pa un hende stuur p’abo y durante parada mes, pa hendenan cu ta sufri di malesanan cronico, tuma medicamento, percura pa bo bebe suficiente likido. Tene bon bista riba e muchanan. Hopi biaha ta sosode cu pa falta di atencion na mucha, cosnan por pasa.
