E departamento encarga cu mercadeo a pone Serlimar perde un contrato di miles di florin pa luna. Poco interes y falta di conocimento a causa esaki.
Den Serlimar tin basta hende cu e minister a hinca cu ta campanjadornan. E hendenan aki no tin conocimento di e trabou y ta simplemente pago bek na campanjadornan cu trabou. Costonan di operacion na Serlimar a aumenta drasticamente y e entradanan si no a crece pareu. Entre nan cu nan di POR tin hasta pleitamento den Serlimar. Esaki despues cu a move e otro trahadornan cu Tabata eyden.
E minister tin un spion cu ta cana eyden y ta causa hopi problema cu e hiba trece. Tur hende conoce e spion aki cu hasta ta bishita cas di famia di e minister. E ta kere cu e mes ta manda den Serlimar. Ta un trahador cu a ser kita pa fraude y a perde caso tambe den corte. Gobierno a gana su cas. Ora gobierno nobo a sinta e mandatario a pone e trahador aki bek den Serlimar y ta e spion cu ta hiba trece. Un damita cu e minister a hinca den e departamento di Mercadeo y pusha pa otro campanjador trahador den Cocolishi pa mesun minister ta esun cu parce entre otro a faya cu un contrato mensual di miles di florin.
Un compania cu ta handle un compleho di casnan luhoso tin lunanan largo ta pidiendo un oferta na Serlimar. E casnan luhoso aki ta keda den un compleho riba e caminda direccion Rooi Santo pa Westpunt. Despues di basta peticion pa contrato, finalmente Serlimar no Tabata contesta of presenta un oferta. E departamento di mercadeo a causa tambe cu 190 baki di sushi no por a ser entrega. Kiermen si multiplica 190 baki di cas pa luna, aki por mira claramente cu e suma ta core den 5000 florin pa luna cu Serlimar a perde. Otro compania priva y serio a tuma over. Maneho iresponsabel pa un compania cu placa di pueblo ta paga pa e por existi.
Ainda e mandatario kier mas placa pa sigui djo djo despues cu ya caba Parlamento mes a pone sumanan grandi pa acomoda Serlimar. Parlamento mes ta den un silencio cu e deroche di placa cu tin den Serlimar. Ken ta paga pa e eror cometi cu negligencia di trabou cu Perdida di miles di florin, kizas e mandatario of Serlimar mes por sali splica. E bakinan awor ta pone den e garage unda tabata keur auto na ex DTI.
