Sindicato SEPPA ta yama un reunion urgente mañan cu e werksternan pa papia riba nan situacion cu kier kita nan for di trabou. Ta trata di 90 hende muhe cu posiblemente lo perde nan entrada. Stichting Katholiek Onderwijs Aruba (SKOA) a yama e werksternan un pa un, unda cu nan ta informa nan riba pakete.
Esaki ta algo cu no a cay bon cu e 90 werksternan y di biaha a informa e sindicato referente e reunion cu SKOA. P’esey SEPPA ta invita e werksternan pa un reunion sumamente urgente mañan pa 1:30 pm na nan sede.
E problema di e werksternan Tur cos a cuminsa aña pasa durante pandemia. Segun SKOA, e Minister di Enseñansa demisionario ta esun cu mester percura e pago di e werksternan. Di otro banda e mandatario demisionario a indica cu e dunado di trabou ta SKOA, kiermen nan ta encarga cu e pago di salario. Desde cu e problema aki a surgi e trahadonan di limpiesa no tin un trankilidad y awo a haya e noticia di un pakete.
Desde aña pasa nan a presenta n’e gobierno pa mustra nan malcontento cu e situacion aki, cual te fecha di awe no tin un solucion. P’esey SEPPA ta bay sinta cu nan pa wak kico e werksternan kier haci.
