Selikor ta instalá un planta nobo pa kima shushi

Djabièrne 2 di ougùstus Minister di Salubridat, Medioambiente i Naturalesa, sra. Suzanne Camelia-Römer a primi e kònòpi pa di forma simbóliko sende e planta pa kima shushi ku Selikor NV a atkerí resientemente. E invershon den e planta akí tabata nesesario pa remplasá e planta bieu ku Selikor tabata manehá pero ku ya no tabata funshoná optimal.

Na aña 2003 Selikor NV a introdusí e método di deshasí di shushi den kua ta kima shushi di forma responsabel, sin emití gasnan ku ta dañino pa nos medioambiente. Kimamentu di shushi ta un di formanan mas moderno pa deshasí di shushi banda di e método tradishonal di lèntfel. Sigur pa loke ta trata e kategoria di shushi spesial, e método di kima shushi ta duna e mihó resultado kompará ku simpelmente dera e shushi. Bou di e kategoria di shushi spesial ta kai entre otro e siguiente tiponan di shushi: médiko, kímiko, potenshalmente infeksioso, farmaseutiko, laboratorio, veterinario, kadaver di bestia, droga, zeta di kushina, kuminda ku a pasa fecha di vensementu etc.

Pa aña Kòrsou ta generá algu mas ku 5000 tòn di e tipo di shushi speshal akí. Tambe por kima dokumentunan konfidensial tantu den forma di papel komo den forma elektróniko (kòmpiuter, diskette, cd-ROM ets.). Kimamentu di e tipo di shushi speshal akí tin hopi benefisio. Na promé lugá e proseso akí ta duna e siguransa ku e shushi ta keda destruí kompletamente.  Mundialmente e método akí ta ser konsiderá komo unu seif i responsabel pa nos  medioambiente i nos salú. Na lugá di hiba shushi di karakter konfidensial na lèntfel òf laga shrèd esaki, por destruí esaki den un forma efektivo i efisiente. Di e forma akí por garantisá ku e shushi ta keda destruí kompletamente i di un forma 100% konfidenshal. Kimamentu di shushi speshal den un forma responsabel ta demonstrá ku Selikor ta sigui duna importansia na un maneho di shushi responsabel i na medioambiente saludabel.

Selikor su fòrnu ta usa e proseso di pyrolyse ku ta funshoná di e siguiente forma: Ta hinka e sushi den e promé kompartimentu di e fòrnu kaminda ta kima e sushi den un forma kontrolá na un temperatura di 800˚C durante un periodo di 6 pa 8 ora. E gasnan ku ta sali for di e promé kompartimentu ta bai den e di dos kompartimentu kaminda nan ta kima na un temperatura super haltu di 1200˚C durante 1 te 2 sekònde. E proseso akí ta kibra tur e komponentenan kímiko den e gasnan i ta eliminá kualkier emishon peligroso. Despues di esaki e gasnan ta pasa dor di un scrubber muhá pa neutralisá esakinan i saka tur komponente dañino ku por a keda atras. Kada kompartimentu di e fòrnu tin un kapasidat di 7m3 i kada kompartimentu por karga un promedio di 1 tòn di sushi. Esaki ta nifiká ku pa dia por kima un promedio máksimo di 2 tòn di sushi.

Comments

comments