E prome seleccion di kickingball Aruba, a yega awe tardi. Nan lo bin cu cuater trofeo: miho left field den persona di e atleta Mariale Arancibe, miho short field den persona di Kelly Caroline, miho tercera base den persona di Lineing Angulo y e prome homronero di e torneo Scarlett Lovengreen.
Rebecca Morillo, atleta di e seleccion, a bisa cu aunke nan no a logra e victoria, nan a bin bek yena di experiencia pa mehora e fayonan. Awo kickingball lo tin un miho vision di loke nan tabatin den mente, nan a siña reglamento cu ta parti di e disciplina deportivo aki.
Nan kier a gradici Dios pa a duna nan e oportunidad di a representa e isla y na tur e personanan cu a colabora cu nan ora cu nan tabata para n’e rotonde pa recauda fondo. Cada florin, diesplaca of cuater placa a yuda nan na haya e experiencia cu nan tin awe. Na tur esunnan cu di un of otro forma a apoya nan pa nan por a bay representa e isla.
E atletanan cu tabata presente den varios di nan actividadnan cu nan a organisa, un danki di curason n’e pueblo Arubano.
Por ultimo Morillo a indica cu nan lo sigui traha como un solo ekipo den desaroyo di deporte y mas cu tur den e disciplina di kickingball.
