Lieke Wijga y Tim van der Vegt, ambos trahando na Aruba Wine and Dine (AWD), a atende
exitosamente un Sommelier course yama WSET nivel 2 (Wine & Spirit Education Trust).
E dosnan aki sa hopi mas riba druif, biña, region, sabor y caracteristicanan despues di a purba 50 diferente biña den tres dia. Nan docente experto tabata Christian Esser for di Austria – e ta bibando na Cayman Island. E WSET ta un curso di sommelier internacionalmente reconoci cu su cuartel general na London. Lieke (26) ta e F&B manager na MooMba, Hadicurari y Nos Clubhuis. Aunke cu el a studia intervention criminology, el a traha den e negoshi di restaurant na Hulanda y na Aruba prome cu el a dicidi pa bin y biba akinan. Aruba semper a atrae, ya cu el a biba aki cu su mayornan y ruman homber for di 1991 – 1996. Trahando caba na MooMba na 2013 y 2014 como waitress, el a bin bek na 2016. Tim (28) ta manager na Tango Argentine Grill. Despues di su estudionan na Zwolle (Middelbare Hotelschool) y Leeuwarden (Hogere Hotelschool), el a bula bin Aruba pa un pasantia. E isla a keda yam'e bek despues cu el a caba cu su estudio na Hulanda, asina el a bin bek 7 aña pasa. El a traha na Salt & Pepper den Arawak Garden pa 4 aña prome cu el a bay Tango. Tim ta hopi contento cu su amiga y su 2 cachonan mala mucha.
E curso di biña aki, teni na November na Pepia Est, ta consisti di hopi teoria, general y
informacion specifico, tasting, sinti e aroma y studia. Docente Christian a subraya e varios
regionnan di biña na mundo y a papia riba dicon cierto variedadnan di druif ta florece den
cierto condicionnan. Cuminda y emparehamento di biña tambe a forma parti di e curso. Hunto
cu otro seis participante, Lieke y Tim mester a contesta 50 pregunta di multiple choice riba e
dia final prome cu nan por a hala rosea di alivio ora cu nan a caba. Siman pasa e resultado a
drenta: ambos a ricibi nan certificado! E dos junior sommeliernan aki lo por haci uzo di nan conocemento nobo den nan trabao: "Awo nos tin un miho bista den loke por bay bon cu ki plato." Pa ilustra esaki, nan a agrega: "Un Riesling, por ehempel, ta bay bon cu cuminda Asiatico, mientras cu un skirt steak (lean, cu hopi sabor) ta wordo complementa pa un Malbec, smooth y suave." Hopi impresionante berdad. Pabien na Lieke y Tim. Nos ta spera cu nan continua nan estudio den e intrigante mundo di biña. Tin un curso di nivel 3 realmente dificil cu lo tuma luga pronto…
