Hues a prohibi Gobierno pa nombra directiva nobo den Lotto

Diaranson dia 10 di januari 2018, Hues mr. J. Sap a tuma un decision den e caso sumario cu Stichting Fundacion Lotto pa Deporte a entama contra Gobierno di Aruba. Pendiente e caso cu ta tuma luga dia 22 di januari proximo, Hues a tuma un “ordemaatregel” den cual ta prohibi Gobierno, durante e periodo di impasse y e caso den Corte di Prome Instancia (AUA201800022), pa tuma cualkier decision relaciona cu e organisacion Fundacion Lotto pa Deporte.

Stichting Fundacion Lotto pa Deporte, ta representa pa abogado mr. B.J. Huiskes. E miembronan di directiva ta Silvio Janga, Benvinda de Sousa, Antonius Kamperveen, Flavio Faneyte y Elias Kock. Gobierno di Aruba ta uza bufete di abogadonan Croes, Wever & Tchong cu nan abogado mr. Anthony Ruiz.

Corte a tene cuenta cu dia 5 di januari ultimo, Fundacion Lotto pa Deporte a entama un caso sumario contra Gobierno, relaciona cu e decision di Minister Dangui Oduber pa retira e Hunta di Supervision den bloke. E peticion ta pa anula e decision aki y permiti e hunta di supervsion pa sigui haci nan trabou di acuerdo cu e contract vigente.

Pero, dia 8 di januari 2018, e mesun Hunta di Supervision a haci un peticion special na Corte, pidiendo pa un “ordemaatregel” den cual ta prohibi Gobierno pa tuma cualkier decision, por ehempel nombra otro miembronan den e Hunta di Supervision of stroba e Hunta di Supervision di sigui opera, tanten cu e caso no tuma luga den Corte.

Di otro banda, abogado mr. Anthony Ruiz a sigura Hues cu e peticion ta dificil pa Gobierno pasobra dia 3 di januari 2018 caba nan a nombra miembronan nobo den e Hunta di Supervision di e fundacion. Aunke cu ainda e nombracion no ta formal pasobra no a inscribi nan na Camara di Comercio, pero cu Gobierno no ta na fabor pa duna siguransa cu e lo no inscribi e miembronan nobo durante e periodo aki.

Teniendo esaki na cuenta, Corte a dicidi mesora y a informa Gobierno di su decision pa cu e “ordemaatregel” aki, prohibiendo nan pa haci cualkier cambio den e siguiente dianan te ora cu e caso tuma luga dia 22 di januari 2018.

Na final, Hues a subraya cu no mester crea ningun tipo di conclusion cu e decision aki di e “ordemaatregel” por tin algo di haber cu final di e caso aki, pasobra Corte no a trata contenido di e caso ainda.

Decision caso sumario FLPD-Gobierno