Recientemente e parlamentario pa fraccion di Partido di Pueblo Arubano (AVP) a duna un declaracion den cual ta indica cu e esencia di e ley Landsverordening Normering Topinkomens (LNT) ta cu esun cu ta traha den sector semi publico, esun cu ta traha na WEB, na Elmar, Setar Banco Central, APFA, etc. cu e hendenan aki ta gana demasiado placa y cu mester baha nan salario. Ta haci comosifuera aki ta unda e placa di pueblo ta lek y esaki simplemente no ta berdad.
Si nos bay puntra nos mes unda e placa ta lek, nos sa. Nos sa kico ta nepotismo, nos sa kico ta friends and family, nos a wak Lotto pa Deporte, nos a wak hopi caso di cerca, entre otro, nombramento den e companianan estatal. Bou di e gobierno aki nos a wak con tin un conflicto di interes miyonario entre e Minister Endy Croes cu ta minister responsabel pa deporte y na mesun momento e tin fundacion Lotto pa Deporte bou dje.
Bo ta wak ki peliger esaki ta trece cu ne pa metemento politico y loke bo kier haci pa e ley aki no solamente empobrece bo pais, manera tur e otro medidanan. Si bo wak BTW, e ta pa empobrece e pais aki pasobra loke bo ta bisa ta cu e pueblo ta haya demasiado placa of ta gana demasiado bon, nos por ranca 160 miyon extra. Esey bo kier haya cu BTW. Bo ta haya cu e pueblo aki ta haci demasiado uzo di cuido medico p’esey bo ta bin cu eigenbijdrage, pa bisa un señal cla pa hende no bay dokter. Pesey bo bin cu e recorte di 12.5% p acu ambtenaar, paso tin mucho vet. E hendenan aki ta gana demasiado.
Pero e realidad ta cu ora nos wak unda e lek ta: friends & family. Es mas, te hasta un CFT ta bisa bo awo, hasta un Raad van Advies ta bisa bo. Ora nos a wak goederen en diensten desde 2015, e gastonan a sigui subi. Anto ainda e politiconan aki y nan compinchinan ta keda grita mega debe haciendo mega debe. Anto e pregunta ta: ora cu abo ta keda sin coriente, ora abo no tin awa, ora cu bo conexion di internet cay afo. Ora bo no por manda placa afo, ora cu tin problema financiero na Aruba, ken bo ta bay culpa? Guera?
Un gobierno cu a priminti bo bon gobernacion financiero, wak e calidad di e ley aki. E consehonan a bin despues cu nan a bin cu e proposicion di ley; e consehonan a bin despues cu a bo a bay di acuerdo of bin cu normering topinkomen cu Hulanda. Cu otro palabra, bo no a prepara bo mes pa e reunionnan cu Hulanda, bo no a prepara bo mes pa e ley aki manera debe ser. Mescos cu England y Rocco Tjon a haci cu e leynan cu m’a bisa y mustra con Raad van Advies a taha nan, a mustra cu loke nan a entrega ta un tristesa total.
E gobierno aki no solamente a haci esey, pero a bula riba e pensamento di ban corta den salario di e hendenan cu ta traha na WEB, na Elmar, na Setar, etc. Y e pregunta ta pakico? Wel, un di e contestanan aki ta bay legalisa nepotismo den e sector semi publico. Dicon? Lesa e ley pasobra pa haci un excepcion, bo no mester bay Parlamento. Pa bo haci un excepcion riba e ley aki y paga un hende mas placa, loke bo mester ta e aprobacion di e minister y conseho di minister; e politiconan na Cocolishi. Esey ta loke e ley aki ta: legalisa nepotismo na Aruba.
