Diabierna anochi a tuma luga cendemento di luz di Pasco, e iluminacion di fin di aña dilanti di Parlamento, na Plaza Henny Eman y rond di Cocolishi a contribui na crea un ambiente festivo y di speransa na Aruba. Rene Herdé, Minister di Infrastructura, Energia y Telecomunicacion, a expresa su gradicimento na e trahadonan di Departamento di Obra Publico (DOW) pa e trabou cu nan a haci pa prepara e instalacion di e luznan.
Herdé a splica cu e trahadonan di DOW a traha durante e ultimo dianan pa prepara tur cos, pa e anochi aki por a cende e luznan. E a gradici e ekipo pa nan dedicacion y e trabou cu nan a entrega.
Segun e mandatario, e iluminacion ta mas cu solamente decoracion. E ta un contribucion pa crea un ambiente di speransa, unda e luznan ta simbolisa cu e temponan dificil por pasa y cu hende por mira futuro cu optimismo.
E tambe a destaca cu e periodo di fin di aña ta un momento pa hende pone diferencia un banda, acerca otro y comparti un sentimento di union. E deseo ta pa tur hende mira dilanti cu speransa cu e futuro lo trece miho oportunidad pa Aruba.
E aña aki ta prome biaha cu DOW a instala e iluminacion den e trayecto cu ta cuminsa dilanti di Oficina di Gobernador, pasa Plaza Henny Eman y dilanti di Parlamento, te na Bestuurskantoor.
Herdé a conta cu e trahadonan di DOW caba a indica cu pa otro aña nan tin intencion pa amplia e decoracion ainda mas.
Pa Herdé, iniciativa asina ta mustra cu hasta cosnan chikito por tin un aporte positivo na e ambiente di e pais. E aña ta un oportunidad pa Aruba expresa orguyo den su pais y mustra cu tin hopi cos bunita cu por logra pa beneficio di tur hende.
