Pa mas di 40 aña e ta e bos cu ta conta e minuutnan final pa cera y habri aña nobo via radio. Un personahe di radio cu a traha su nomber tambe pa su forma unico di nara weganan di futbol. Su programa romantico na radio tabata yama: “Mi nomber ta Roberto y di bo?”. Un rato pasa famia a confirma cu Roberto A. Geerman a fayece na hospital.
Ta for di diasabra a presenta reto cu su salud y a intern’e. Pa un tempo caba e tin problema cu pulmon y tabata cana cu un mashin. Den fin di siman e retonan a bira pio y na hospital a opta pa intern’e pa por brind’e cuido. Aunke a sinti cu ayera a bay miho y cu e tabata mustra recuperacion, awe mainta trempan lo a presenta un situacion di reto cu su curpa no por a tuma mas y a entrega e guera.
Tres aña pasa ainda e Asociacion di Radionan di Aruba a presenta un homenahe na Roberto Geerman pa tur su añanan dedica na locucion. A traha hopi aña na Voz di Aruba, na Canal 90 FM y pa e ultimo decadanan na Radio Galactica FM. Hopi forsa na famia y su amistadnan. Mundo di radio awe ta di luto, cu e perdida inespera aki. Cu Roberto sosega na paz.
