Topico di Husticia en general y su desaroyo ta di sumo importancia y durante declaracion e siman aki Parlamentario (AVP), un ex Alto Inspector di Polis, Robert Candelaria, a splica riba diferente topico cu tin e comunidad preocupa. Den un entrevista a menciona algo cu tin e comunidad riba alerta cu ta “Handgranaat” y aki Robert Candelaria a haci mencion riba situacion cu a pasa aña pasa caminda a haya un handgranaat durante detencion di personanan indocumenta drentando nos isla.
E realidad ta cu tin hende drentando nos frontera keto bay, cu arma, no solamente aki pero na Corsou no mucho tempa atras, autoridadnan a logra confisca un arsenal di arma pisa. Esaki ta solamente den un accion/un caso. Si imagina cu e botonan aki ta yega Corsou cu ta den un distancia mas leu di costa di Venezuela cu esun di Aruba, ta conclui cu na Aruba tambe nan lo ta drenta y for di e ultimo detencion a saca afo cu a descubri bala cayente den nan posecion.
Robert Candelaria su preocupacion mas grandi, caminda su persona actualmente den Parlamento den representacion di pueblo, no ta su intencion di para na canto zundra y grita den direccion di Minister/Gobierno como cu esey no ta na bienestar di e pais. Pa score algun punto politico cu e tema aki lo ta mas bien infantil y no lo yuda Aruba cu nada. Ta na su luga pa para keto y realisa cu nos ta den un situacion di crisis.
A menciona e intervencion Militar tambe como topico, caminda for di comienso y na varios ocasion a vocifera cu su persona ta pro yudansa di mas instancia posibel pa duna un man pa cuida frontera. Cu si acaso lo mester intervencion di Kustwacht, Duana, Militar, hunto cu Polis e ta di acuerdo pa haci’e, pero esaki lo mester ta haci CORECTAMENTE!
Den su splicacion Robert Candelaria ta referi na e yudansa por ehempel di Militarnan, cu si acaso nan lo kier duna un man, e ta mas cu bon bini, pero mas cu claro tin cu bisa kico ta spera di dje, cua ta su autoridad cu e tin pa haci e funcion na e momento ey y bou di ken su responsabilidad. Duana al igual tambe tin su “taak bescrijving” na unda e ta cay aden pa yuda cuida frontera, aunke e no ta tumando luga y na esaki tin cu para keto pasobra no tin cu inventa e wiel, ta algo cu antes tabata tuma luga sin problema alguno, cu Polis y Duana ta forma team pa traha hunto. Boarding Team sigur ta cay den mencion akinan, caminda no tabata warda pa Boto cu ilegal yega costa, pero mas bien Polis y Duana hunto ta yega te na e Botonan aki, subi y haci control y awe no ta mira dicon esaki no ta tumando luga.
Para na banda critica ta facil, cual no ta su intencion, contrario ta conseho y sugerencia valido ta locual e ta bin dilanti cu ne, manera entre otro e Ley di LTU, caminda e minister lo a bin cu idea pa introduci ley, cu lo bay ta holistico cu lo cubri tur cos y obviamente esaki no a tuma luga. Mirando su fayo el a bisa awo, e kier trece bek cierto cambionan den ley. Consehabel y miho opcion awo akinan lo ta pa pone tur cos un banda y traha un rato riba ahustenan riba e Ley di LTU. Mirando e sierto cantidad di ilegalnan cu ta specula cu tin riba nos Isla, cada minister menciona un cifra diferente, ta miho sali di e punto di bista cu tin Ilegalnan riba Aruba, algun buscando trabou pa sostene famia y/o otronan ta bin pa comete actonan criminal riba nos pais.
Locual cu mester tene na cuenta ta esnan cu ta akinan y cla pa ricibinan. Esnan cu ta ofresiendo na dak, trabou y asina fasilita locual nan a bin ta haci akinan, anto sigur lo sigi bin mas!
Solucion concreto ta locual cu Robert Candelaria ta mira akinan, caminda e hendenan cu ta trese hende ilegal riba nos isla, ta haya boet, cera nan den prison y/o castigonan serio pa asina evita cu hendenan akinan ta sigi brinda yudansa na personanan ilegal y cu consecuencianan pisa den nan direccion.
