Parlamentario di AVP, Robert Candelaria ta conta cu e fraccion a haya un recorido den e facilidadnan di Guarda nos Costa (GNC), tanto na Dakota como na Sabana Berde. E ta indica cu a haya un splicacion loke ta haciendo, entre otro e trabaonan riba e edificionan.
Tabata e comision fiho di parlamento cu a haci e bishita na e dos sedenan. Esaki tabata un recorido pa asina conoce e luga miho. Loke Candelaria ta haya un bon desaroyo den ultimo tempo, ta cu e vuelonan humanitario a cuminsa bek y esey ta algo cu ta hopi corecto y husto.
“No ta bon pa tin un hende cera pa hopi largo, en particular un hende cu no a comete un hecho castigabel. Den e caso aki ta contento cu e hendenan por a bay nan luga bek.”
Den pasado, Candelaria ta bisa, el a cuestiona na mas cu un ocasion e proyecto cu tabatin na Huis van Bewaring, pa motibo cu e fondonan cu a bin fo’i Hulanda, e forma cu a cumpra containernan bieu y segunda mano pa despues bay traha riba nan, por a hacie na un forma diferente y mas eficiente.
Tambe a cuestiona e prioridad di e tempo aya, cu lo tabata miho pa inverti den un manera cu lo tabatin mas sentido na luga di cumpra cosnan bieu y drecha nan djis pa tapa bista di Hulanda.
Awo cu hendenan ta bayendo nan pais hopi mas lihe bek, cual ta un trato mas humano pa e hendenan cu no ta documenta, e ta costa Aruba menos placa tambe.
Situacion na Dakota
Candelaria a señala e situacion di antes, cu tabata mira hopi den prensa, unda ta mira hende para riba dak ta grita y protesta, aworaki no ta experencia esey.
Loke ta keda cuestiona ta e fondonan aloca di Hulanda si a uza nan di e forma mas efectivo, cual ta keda un preocupacion pa nan. Ta un caso di “no crying over spilled milk,” el a bisa. Pero a prefera cu na inicio a pensa hunto con lo por a hacie den un forma mas miho. Pero ta cosnan cu a tuma luga caba, pero awo nan t’ey.
Derechonan humano
Por a mira e staff di Guarda nos Costa tabata parce cu nan tin nan trabao bon organisa. Por a mira cu e team completo ta parce motiva, contento cu pa e forma con cosnan ta cana. “Ora cu trahadonan ta sinti nan mes bon, ta reina un esfera di paz. Esey tambe ta afecta e producto di trabao cu nan ta entrega. No a mira nada di preocupacion y tension,” Candelaria a bisa por ultimo.
