Tin un indicacion cu un of mas pasahero di e dos vuelonan cu a yega diasabra fo’i Sur Africa na Schiphol, ta portado di e variante nobo di Coronavirus Omicron. Esey ta loke RIVM a informa diasabra anochi despues di un analisis preliminar.
Diabierna anochi, 624 pasahero cu a bin di Sur Africa a haci test na Schiphol door di GGD Kennemerland. Di nan, 61 pasahero a resulta positivo. E pasaheronan aki ta den cuarentena den un hotel cerca di Schiphol.
A haya e variante Omicron probablemente cerca varios persona infecta. A manda muestra di e testnan pa RIVM pa nan analisa esaki mas profundamente y determina si e variante nobo descubri na Sur Africa, ta envolvi. Pa awe ainda ta spera resultado.
RIVM ta haci un yamado na e biaheronan cu a bin di Sur Africa, Botswana, Malawi, Lesoto, Swaziland, Namibia, Mozambique of Zimbabwe dia 22 di november of despues, pa nan haci test, aunke nan no tin keho. Pa nan a laga un number di telefon special pa nan por tuma contacto.
Minister Hugo de Jonge tambe a haci un yamada urgente n’e biaheronan aki pa nan haci e test y drenta den cuarentena.
Debi na e posibel infeccion door di Omicron e Hulandesnan cu ta biaha pa Suisa mester presenta un test di Coronavirus negativo y independientemente di e resultado, pasa dies dia den cuarentena despues di nan yegada. Gobierno Suiso a anuncia esaki despues di e noticia di RIVM. E Suisonan no ta distingui entre e personanan vacuna y no vacuna.
RESTO DI EUROPA
E variante Omicron tambe a aparece den e paisnan bisiña. Na Alemania a identifica dos caso di infeccion na Munich cu e variante aki. E biaheronan a bin bek di Sur Africa na principio di e siman aki. Tambe den Reino Uni nan a haya dos caso, segun a anuncia awe.
Na italia, a diagnostica e variante Omicron cerca un persona cu a bin bek recientemente fo’i Mozambique. “E pashent y su famia ta den bon estado di salud,” e Instituto Nacional di Salud a informa. E infeccion a sali na cla durante un test di laboratorio den un hospital di Milano.
Belgica tabata e prome pais Europeo unda cu a haya e variante. Te aworaki solamente tin un caso. Fuera di Europa y Africa, e variante nobo aki a aparece na Hong Kong y Israel.
Organisacion Mundial di Salud (WHO) a clasifica e variante como motibo di preocpacion, pero ainda no ta cla cualnan ta e consecuencianan p’e gravedad di e enfermedad y e eficacia di e vacunanan.
