“Den un pais, unda ta reina e deseo ferviente pa sali for di e constelacion Antiano y bira un pais autonomo den Reino Hulandes, bo mester promove e simbolonan di union, identidad y libertad, unda cu cantando bo himno bo ta expresa bo amor pa bo pais y hisando bo bandera bo ta inculca patriotismo bao di bo pueblo.”
Desde e añanan 1930 y durante varios decada Aruba tabata sinti su mes incomodo den un structura estatal cu no tabata faborece nos pueblo. Alabes e trato cu Aruba tabata haya no tabata duna espacio pa sigui bao di e structura aki. Ta p’esey e pueblo na varios ocasion a manifesta su deseo pa caba cu e dominio aki y tabata boga pa Aruba haya un status autonomo den Reino Hulandes.
MESA RONDO NA HULANDA
Dia di Himno y Bandera ta un Dia Nacional cu ta celebra tur aña riba 18 di maart. Dia 18 di maart, ta un dia historico y festivo na unda ta celebra nos “Status Aparte”, como tambe e creacion di e Himno y Bandera di Aruba. E ta un Dia Nacional, pasobra riba e fecha aki na aña 1948, durante ‘Mesa Rondo na Hulanda’, pa prome biaha a entrega un mocion na Su Mahestad Reina Juliana, cu ta boga pa autodeterminacion di e pueblo Arubano.
E delegacion Arubano tabata bou di liderazgo di Shon A. Eman y 2147 Arubiano a firma e peticion aki. Y dia 18 di maart na aña 1976, durante e acto oficial organisa pa Gobierno Insular di Aruba, den Wilhelmina Stadion, pa proclamacion oficial di Nos Himno y Bandera, a hisa e Bandera di Aruba pa prome biaha y a toca e cantica ‘Aruba Dushi Tera’ como e Himno di Aruba.
UNION DI E PUEBLO ARUBIANO
Lamentablemente e partidonan politico di e temponan ey no tabata uni den nan pensamento y accionnan, cual a impedi pa logra concretisa e deseo di pueblo. Y a dura hopi aña prome cu Aruba a haya un politico visionario den persona di Betico Croes kende desde principio di su carera politico a pone como meta pa trece union bao di e pueblo Arubano.
Betico Croes, den cuadro di su strategia pa concretisa e deseo di nos pueblo pa su libertad, a mira den introduccion di himno y bandera instrumentonan clave pa logra trece union den e pueblo Arubano. Un union cu a wordo fortifica mediante e pensamento cu tur esnan cu a nace aki y otronan cu a bin Aruba y haci e isla aki nan hogar y cu ta stima e isla aki ta Arubiano.
Den e luz di e desaroyonan aki y teniendo cuenta cu deseo di pueblo pa haya mas libertad politico y treciendo e union bao di nos pueblo, Gobierno di Aruba a dicidi di duna Aruba su propio himno y bandera nacional.
COMISION HIMNO DI ARUBA
Asina pues un Comision di Himno a ser institui dia 21 di januari 1976 cu a haya e tarea pa conseha gobierno si mester haci “Aruba Dushi Tera” himno nacional. E comision tabata consisti di e siguiente miembronan: Maybelline Arends-Croes, Rufo Odor, Juan Chabaya (Padu) Lampe, E. Bennett, Hubert (Lio) Booi, Rufo Wever y secretario Juan E. Wever.
E comision a conseha pa no cambia e melodia original di Aruba Dushi Tera pa un marcha, pero aumenta e cantidad di verso. E di tres verso ta skirbi door di Hubert Booi.
ARUBA DUSHI TERA
“Aruba Dushi Tera” ta himno nacional di Aruba. E ta skirbi den forma di un wals pa Juan Chabaya Lampe y ta compone pa Rufo Wever. E di tres y ultimo parti ta skirbi pa Hubert ‘Lio’ Booi.
E cancion tabata uno popular entre e habitantenan y ta data di comienso di decada di 1950. E conseho tabata pa no cambia e melodia bieu di Aruba Dushi Tera den un marcha pero pa aumenta e cantidad di couplet. E di tres couplet ta skirbi pa Hubert Booi.
E comision a duna su recomendacionnan na Gobierno Insular y dia 16 di maart 1976, esta 48 aña pasa, Eilandsraad di Aruba a aproba ‘Aruba Dushi Tera’ como himno oficial di Aruba.
Alabes dia 21 di januari 1976 Gobierno di Aruba riba proposicion di Betico Croes a nombra un comision cu tabatin como tarea pa organisa un concurso den pueblo pa diseña un bandera pa Aruba. E comision tabata consisti di e siguiente miembronan: Julio Maduro, Wouter van Romondt, Ronald Donk y como secretario Juan E.Wever. Cu ayudo di un experto di Merca (Flag Research Institute, Boston) a logra un diseño final di e bandera pa Aruba. Mescos cu tabata e caso cu e himno di Aruba, riba dia 16 di maart 1976 Eilandsraad a aproba e diseño di e bandera oficial di Aruba.
PROCLAMACION OFICIAL DI HIMNO Y BANDERA
Dos dia despues di aprobacion di tanto nos himno como nos bandera, esta 18 di maart 1976, e acto oficial organisa pa Gobierno di Aruba a tuma luga den Wilhelminastadion, caminda a proclama oficialmente nos Himno y Bandera y esaki den presencia di miles di nos ciudadanonan cu a acudi pa demostra nan amor patrio y nan alegria cu Aruba tin awo tambe su propio himno y bandera.
Cu e introduccion di himno y bandera, a pone un piedra firme p’e fundeshi pa construccion di pais Aruba. Cu e himno y bandera e pueblo a sinti cu realmente nos ta un pueblo cu balor y honor y esaki Betico tabata kier p’e pueblo por tin su propio identidad y su simbolonan di libertad.
BALOR DI UN HIMNO
E himno y e bandera t’e identificacion di mas balor c’un ser humano tin di su patria. Bo pais of bo patria bo no por hib’e ningun caminda cu bo, pero bo himno y bandera si. E dos simbolonan aki ta esunnan cu ta pone un ser humano sintie orguyoso di ta forma parti di un pais, den su momentonan di gloria pero tambe di tristesa.
Con leu cu bo por ta di bo pais, na momento cu bo tende bo himno resona, e ta trece un alegria inmenso den bo curason.
Un himno no ta un simpel cancion, e ta un composicion cu palabranan cu semper ta papia di un pais, su cultura, custumber y logro etc. Un himno ni su melodia ta bira bieu, manera otro canticanan cu ta valido durante cierto epoca so.
Como un bon ciudadano, bo mester conoce e letra (e palabranan) di bo himno for di memoria. Si otro cantica bo ta canta cu miedo, bo himno si bo ta canta cu henter bo curason y ta lag’e sali c’un sentimento patriotico. Un himno ta haci bo stima bo pais hopi mas.
CON TA CANTA UN HIMNO
Lanta para, cara pa e bandera, keda para keto y cu respet mientras ta toca of canta himno, incluyendo esun di e pais bishitante. Memorisa e palabranan y canta bo propio himno cu respet y cu aprecio. Canta e palabranan corectamente y den e secuencia corecto. Canta himno di un pais stranhero ta opcional.
No ta permiti pa cambia palabra, ni ritmo, ni melodia di un himno. E himno ‘Aruba Dushi Tera’ ta skirbi den un compas di ¾, un wals modera, cu mester canta na un manera mahestuoso y respetuoso.
CON TA SCUCHA UN HIMNO
Na prome luga na momento cu a anuncia e himno tur hende homber, hende muhe y mucha TA LANTA PARA. hende homber ta botona of cera su flus y si e tin sombre of pechi bisti, e ta kita esakinan. Hende muhe por keda cu nan sombre bisti. No ta permiti BAILA NI MOVE riba ritmo di un himno.
Hende homber, muhe y mucha ta scucha un homno cu nan mannan colga cada banda di nan curpa. E man no mag ta crusa, tampoco tras di lomba, pero na cada banda di bo curpa of sea den forma di guardia.
Tambe bo por pone bo man drechi na bo curason como muestra di sentimento patriotico. Bo wowo nan bo ta fiha stret bo dilanti cu bo cara na laira y no ta canta e himno moviendo bo cabes. Tambe bo por fiha bo bista ariba e bandera si e t’ey, of ariba e persona cu ta cantando e himno, or ariba e persona principal para bo dilanti riba escenario.
Despues cu himno termina, normalmente no ta bati man, mester mantene respet na tur momento.
