Historia
A introduci e bandera di Aruba oficialmente riba 18 di maart 1976, hunto cu nos himno nacional oficial, “Aruba Dushi Tera”. Y desde 1 di januari 1986 cu Aruba a ricibi su “status aparte”. Esey kiermen cu e posicion di un pais autonomo den Reino Hulandes, ta e bandera di Pais Aruba hunto cu e himno y escudo riba 17 october 1991 a keda hancra den ley (AB 1991 no. 101 (revisa den AB 1991 no. 118)¹ y a inclui e colornan oficial geel, blauw, blanco y cora². E ley aki ta for di e temp’ey semper valido y aplicabel riba e bandera oficial di Aruba.
Color
- E color blauw di e bandera ta representa e lama inmenso, cu Aruba ta rondona door dje. Geel ta e color di abundancia y e liñanan horizontal ta mustra e solidez di tal abundancia Geel ta representa e fuente di ingreso, manera e industria actual y turismo como fuente di ingreso di mas importante, manera e industria di antaño di oro, guamo y aloe.
- Geel ta e color tambe di un cantidad grandi di nos palo y matanan di Aruba cu ta floria geel, manera ‘Kibrahacha’, ‘Brazil’, ‘Bonchi di strena’, ‘Curahao’, ‘Tuturutu’ y ‘Wanglo’
- E strea color cora di cuatro punta ta representa e cuatro direccionnan di e compas y ta simbolisa tambe e diferente pais for di unda e hendenan a bini Aruba y forma un comunidad cu ta biba den harmonia cu otro. Tambe ta representa e industria di antaño di e palo di ‘Brazil’ y e sanger cora di e Indjannan cu a bringa pa nan libertad den ‘Rooi Frances’ na Aruba
- E color blanco na rand e strea, ta simbolisa e santo bunita di e playanan extenso, cu ta rondona nos isla y na e mesun momento e puresa di curason di e habitantenan di Aruba, cu ta respeta husticia, orden y libertad
Uzo di color di bandera
Ta for di varios aña cu hopi discusion a surgi riba e sistema di codificacion di color, di e colornan oficial di e Bandera di Aruba, na unda esaki a ser trece den e circulacion cu colornan cu no tabata semper loke tabata prescribi segun ley tocante exigencia di color y midi. Tin banderanan pa mira den tur sorto di variacion di color blauw.
Despues di varios aña di investigacion riba e sistema di codificacion di e colornan oficial di e bandera di Aruba, Gobierno di Aruba a dicidi den aña 2014 pa fiha e colornan di nobo y esaki conforme e sistemanan di codificacion di color ta ser categorisa awendia. No ta posibel mas pa haya e colornan original di e bandera cu a ser fiha for di 1976 segun ley, pasobra e colornan aki a ser saca di produccion.
Decreto nacional ta renoba y fiha colornan di e bandera
Riba 17 di october 2014 e Decreto nacional di bandera a keda cla y cu cambionan di e Decreto di bandera, escudo y himno (AB 1991 no. 101) (renoba colornan di bandera segun ley; cu indicacion shoco como simbolo nacional) (AB 2014 no. 51), na unda e colornan di Bandera di Aruba segun e sistema di codificacion di color di e fabrica “Pantone” atrobe pa keda estableci.
E color blauw oficial ta awor di ‘Pantone Matching System’ ‘PMS 279 C’ of tambe ‘Larkspur’ cu ta ser referi den ‘British Colour Council Dictionary of Colour Standards’. Esaki ta e color cu ta mas cerca di color original di 1976. Cu e compromiso aki Gobierno kier evita cu lo keda existi confusion ainda den e color blauw y cu ainda lo tin banderanan den diferente colornan blauw ta bula riba Aruba.
Colornan di e Bandera di Aruba stipula segun ley:
- E bandera ta rectangular y tin e colornan geel, blauw, cora y blanco.
- E color di e fondo den e bandera ta blauw ‘PMS* 279 C’ of tambe ‘Larkspur’. Den e tercera parti mas abou di e bandera tin tres banchi igual horizontal, di colornan geel, blauw, geel, respectivamente, y e hanchura di cada banchi ta igual na un-decimo-octavo (1/18) parti di e hanchura di e bandera. E banchi mas ariba ta cuminsa na un distancia di exactamente dos-tercera (2/3) parti di e hanchura di e bandera, midi di ariba bay abou. E color di e banchi meymey ta blauw PMS 279 C. Bou di e tres banchinan aki (geel-blauw-geel) tin un rand hancho, cual ta igual na un sexta (1/6) parti di e hanchura di e bandera, di e color blauw PMS 279 C;
- E color geel di e banchinan ta geel ‘PMS 109 C’ of tambe ‘Bunting Yellow’;
- E color cora di e strea ta ‘PMS 032 C’ of tambe ‘Union Jack Red’. E bandera ta mustra den e parti mas ariba na banda robes un strea regular di cuater punta, di cual e medianonan horizontal y vertical ta core paralelo cu e rand di ariba y di abou di e bandera y e rand na banda drechi y na banda robes di e bandera.
Un liña hala for di cualkier huki banda paden di e strea pasa door di e centro di e strea pa e huki paden en frente ta igual na e largura di un-tercera (1/3) parti di e mediano horizontal of vertical di e strea. E distancia di un punta di e strea pa e otro punta di e strea, incluyendo e zoom blanco ta un-tercera (1/3) parti di e hanchura di e bandera.
E punta mas halto di e strea ta keda na un distancia igual na un-decimo-octavo (1/18) parti di e hanchura di e bandera for di rand ariba e bandera; e punto di e strea mas cerca di e rand robes di e bandera ta keda na un distancia di un-decimo-octavo (1/18) parti di e hanchura di e bandera for di e rand robes paden.
- E color blanco pa medio di cua e strea ta alinia ta ‘PMS blanco absoluto’.
¹ Volgens de LANDSVERORDENING van 17 oktober 2014 tot wijziging van de Landsverordening vlag, wapen en volkslied (AB 1991 no. 101) (hernieuwde vaststelling vlagkleuren; aanwijzing shoco als nationaal symbool) bestaat de vlag van Aruba uit de volgende officiële kleuren:
² Gobierno Aruba, Nationale symbolen
(https://arubaoverheid-preproductie.sim-otap.nl/informatie-dienstverlening/nationale-symbolen_41478/)
Fuente: Stan Dabian
